Idman.biz
Almaniyanın "Bavariya" futbol komandasının hücumçusu Harri Keyn karyerasını Münhendə davam etdirmək istəyir.
İdman.Biz xəbər verir ki, "Sport BILD"in məlumatına görə, İngiltərə millisinin kapitanı 2027-ci ildə başa çatacaq müqaviləsinin uzadılmasını müzakirə etməyə hazırdır. "Bavariya"nın futbolçuya ən azı 2029-cu ilədək nəzərdə tutulan yeni sözləşmə təklif etməsi gözlənilir.
33 yaşlı hücumçu ilə "Barselona" və Səudiyyə Ərəbistanının "Əl-Hilal" komandaları maraqlanıblar. Lakin Keyn bu variantlara üstünlük verməyib və əsas məqsədinin "Bavariya"da qalmaq olduğunu rəhbərliyə çatdırıb.
Onun "Tottenhem"ə qayıdaraq Alan Şirerin İngiltərə Premyer Liqasındakı qol rekordunu yeniləməyə çalışacağı ilə bağlı iddialar da səsləndirilib. Keyn üçün isə hazırda
şəxsi rekordlardan daha çox "Bavariya" və İngiltərə millisi ilə titullar qazanmaq prioritet hesab olunur.
Hücumçunun "Bavariya"da illik təxminən 25 milyon avro (49,6 milyon AZN) qazandığı bildirilir. Yeni müqavilə ilə bağlı danışıqlarda onun maaşının azaldılması nəzərdə tutulmur.
Keyn, həmçinin İngiltərə millisinin heyətində 2030-cu il dünya çempionatında iştirak etməyi qarşısına məqsəd qoyub. Daha uzunmüddətli müqavilənin ona yüksək səviyyədə çıxışını davam etdirmək imkanı verəcəyi düşünülür.
Qeyd edək ki, Harri Keyn 2023-cü ildən "Bavariya"da çıxış edir. O, ötən mövsüm Münhen təmsilçisi ilə Almaniya çempionu olub və Bundesliqada 33 qolla bombardir adını qazanıb.
