Idman.biz
Uruqvayın "Uruguay Montevideo" futbol komandası ilə "Paysandú" arasında keçirilən ikinci liqa matçında qeyri-adi hadisə yaşanıb.
İdman.Biz xəbər verir ki, qarşılaşmanın 23-cü dəqiqəsində "Uruguay Montevideo"nun futbolçusu Riçard Nunes təhlükəli hücumun qarşısını almaq üçün topu güclü zərbə ilə meydandan uzaqlaşdırıb.
Top Parque ANCAP stadionunun hasarını keçərək arenanın yaxınlığındakı magistral yola düşüb. Həmin anda yoldan keçən avtomobillərdən birinin sürücüsü topa dəyməmək üçün qəfil əyləci basıb. Arxadan gələn digər avtomobil isə dayanmağa macal tapmayaraq ona çırpılıb.
Qəza matçın canlı televiziya yayımı zamanı kameralara düşüb. Hadisə nəticəsində xəsarət alan olmayıb.
Qeyd edək ki, qarşılaşma "Uruguay Montevideo"nun 1:0 hesablı qələbəsi ilə başa çatıb. Oyunda yeganə qolu Lukas Rodriqes vurub.
