Idman.biz
İngiltərənin "Bornmut" klubunun hücumçusu Enes Ünal mövsümün ikinci yarısında komandanı tərk edə bilər.
İdman.Biz xəbər verir ki, uzun müddət davam edən çarpaz bağ zədəsindən sonra meydana qayıdan Türkiyə millisinin 28 yaşlı futbolçusu İngiltərə klubunda müntəzəm oynamaq imkanı tapa bilmir.
Enes Ünal noyabrda yaşıl meydanlara döndükdən sonra bütün turnirlərdə 6 oyunda meydana çıxsa da, cəmi 61 dəqiqə oynayıb. O, "Vest Hem"lə matçda sonradan oyuna daxil olaraq bərabərlik qolunu vurmuşdu, lakin bundan sonra yenə də ehtiyat oyunçular skamyasında qalıb.
Daimi oynamaq istəyən hücumçu qış transfer pəncərəsində klubunu dəyişmək niyyətindədir.
Mənbənin məlumatına görə, futbolçu ilə La Liqa təmsilçilərindən "Xetafe" yaxından maraqlanır. Bundan başqa "Jirona", "Real Sosyedad", "Valensiya", "Real Betis", "Sevilya", "Oviedo" və "Rayo Valyekano"nun da hücumçu axtarışında olduğu və Enes Ünal ilə əlaqə qura biləcəyi bildirilir.
Enes Ünal daha əvvəl İspaniyada "Levante", "Vilyarreal", "Valyadolid" və "Xetafe" formalarında çıxış edib.
