Sport24.az
"Qələbə münasibətilə bütün Azərbaycan xalqını təbrik edirəm". Sport24.az xəbər verir ki, bu sözləri Azərbaycan millisinin futbolçusu Edqar Adilxanov deyib.
Əsas yığmada debüt edən 21 yaşlı yarımmüdafiəçi Tacikistana 1:0 hesabı ilə qalib gəldikləri matçdan sonra fikirlərini bölüşüb:
"İlk dəfə debüt etdim. Məşqçilərimə təşəkkür edirəm. Çox xoşbəxtəm. Məncə, millidə debüt etmək hər azərbaycanlı futbolçunun xəyalı, arzusudur. Məşqçilər mənə güvəndiyi üçün xoşbəxtəm".
Adilxanov əsas millidən dəvət gözləmədiyini etiraf edib:
"Sözün düzü, gözləmirdim. Heç xəbərim də yox idi. U-21 millisindən mənim haqqımda soruşurdular. U-21-in toplanışına hazırlaşırdım. Amma əsas komandaya çağırdılar. Çox xoşbəxtəm. İlk dəfə bunu eşidəndə də sevindim. Həmişə öz adımı siyahıda gözləyirdim".
Oyunçu UEFA Millətlər Liqasında Litva ilə keçirəcəkləri qarşılaşmadan əvvəl kollektivdə vəziyyətin yaxşı olduğunu söyləyib:
"Bərpadan sonra Litvaya yollanacağıq. Orada taktiki məşqlər olacaq. Rəqibi yaxşı analiz edib qələbə qazanmağa çalışacağıq".
