Demçenko: "Futbolçularda narahatlıq gördüm"

Misli Premyer Liqasının XIX turunun "Sabah" – "Araz-Naxçıvan" oyunundan (4:1) sonra qonaq komandanın baş məşqçisi Andrey Demçenko jurnalistlərin suallarını cavablandırdı. Sport24.az xəbər verir ki, mütəxəssis əvvəlcə görüşlə bağlı fikirlərini bölüşdü…

– Yaxşı komandaya qarşı oynadıq. Müdafiədə və hücumda yaxşı idilər. Qapımızda gördüyümüz qolları səhvlərimizə görə buraxdıq. İlk dəqiqələrdən rəqibə təzyiq göstərməyə çalışdıq. Pressinq komanda işidir. Təzyiq zamanı səhv etdik və daha sonra qapımızda qol gördük. Əks-hücumlardan üç qol buraxdıq və uşaqların əhvalı korlandı. Hücum oyunu oynamaq üçün istəyin olmalıdır. "Neftçi" ilə oyunda da futbolçularda narahatlıq var idi. Bu gün də çalışdıq, amma alınmadı. Rəqibi nə qədər oyunçunu özünə yaxın buraxsan, deməli istəyin var. Bu gün futbolçularda narahatlıq gördüm. Futbolda bu narahatlıq yaxşı keyfiyyət deyil. Oyunçular dəqiq verməkdə çətinlik çəkir. Komandanı müdafiə oyunundan hücum oyununa keçirməyə çalışırıq. Bununçün vaxt lazımdır.

– Felipe Santos ötən oyundan sonra da meydana daxil olub, fərq yarada bilmişdi, bu dəfə də. Sizin üçün hələ də məşq prosesi daha önəmlidir?

– Bəli, yaxşı göstəricidir. Komanda oyunu tək hücumdan deyil, müdafiədən də asılıdır. Nə vaxt həm hücumda, həm müdafiədə oynayacağıq, daha yaxşı olacağıq. Hansısa oyunçunu fərqləndirmək istəmirəm. Bu gün komanda olaraq uduzduq.