Idman.biz
İspaniyanın "Barselona" klubunun gənc futbolçusu Cessi Bisivu milli komanda seçimi ilə bağlı yekun qərarını verməyib.
İdman.Biz "VoetbalPrimeur"a istinadən xəbər verir ki, 18 yaşlı cinah hücumçusu hazırda Belçikanın U-21 millisində çıxış edir, lakin gələcəkdə Qana yığmasını da seçə bilər.
Bisivu ötən yay "Brügge"dən "Barselona"ya təxminən 10 milyon avroya (19.8 milyon AZN) transfer olunub. O, Belçika klubunun əsas komandasında rəsmi oyuna çıxmadan Kataloniya təmsilçisinə keçib.
Futbolçu seçimlə bağlı tələsmədiyini bildirib:
"Hazırda diqqətimi U-21 millisində qarşıdakı üç oyuna yönəltmişəm. Gələcəkdə nə olacağını görəcəyik".
Belçika millisinin baş məşqçisi Mark van Bommel də gənc futbolçu ilə əlaqə saxlayıb. Bisivunun sözlərinə görə, niderlandlı mütəxəssis onun inkişafını yaxından izlədiyini bildirib.
Qeyd edək ki, Belçikanın U-21 millisi Avropa çempionatının seçmə mərhələsində son olaraq Belarusa 1:0 hesabı ilə qalib gəlib. Komandanı 29 sentyabrda Uels, 6 oktyabrda isə Danimarka ilə oyunlar gözləyir.
