"Barselona" rəsmi saytında 2026-cı ilin sonuna qədər keçirəcəyi oyunların təqvimini təqdim edərkən Azərbaycan təmsilçisi "Sabah"la qarşılaşmaya xüsusi diqqət ayırıb.
İdman.Biz xəbər verir ki, Kataloniya klubu Çempionlar Liqasının əsas mərhələsinin beşinci turunda Bakıya edəcəyi səfəri avrokuboklarda komandanı gözləyən ən uzaq səfər kimi qiymətləndirib.
"Barselona"nın rəsmi saytında dərc olunan materialda bildirilir ki, komanda beynəlxalq fasilədən sonra ilk oyununu noyabrın 22-də La Liqanın 13-cü turunda "Vilyarreal"a qarşı keçirəcək. Görüş "Kamp Nou" stadionunda baş tutacaq.
Noyabrın sonundakı proqramda isə Azərbaycan səfəri xüsusi vurğulanıb:
"Noyabrın sonunda komandanı avrokuboklarda ən uzaq səfər gözləyir. "Barselona" Çempionlar Liqasının beşinci turunda "Sabah"la qarşılaşmaq üçün Azərbaycana yollanacaq. Görüş noyabrın 25-də, çərşənbə günü Bakıda keçiriləcək".
Kataloniya təmsilçisi bu matçdan sonra İspaniya çempionatında səfərdə "Deportivo" ilə üz-üzə gələcək.
Klubun məlumatında qeyd olunur ki, "Barselona" 2026-cı ilin sonuna qədər ümumilikdə doqquz oyun keçirəcək. Hans-Diter Flikin rəhbərlik etdiyi kollektiv həm daxili çempionatda, həm də Avropa arenasında mövsümün əvvəlində əldə etdiyi uğurlu nəticələri davam etdirməyi hədəfləyir.