Idman.biz
Bakıda keçirilən 15 yaşadək futbolçular arasında dünya çempionatı və festivalında İngiltərə və İrlandiya Respublikası millilərinin qarşılaşması irqçilik ittihamı səbəbindən yarımçıq dayandırılıb. İngiltərə yığmasının futbolçuları rəqib komandanın oyunçularından birinin irqçi ifadə işlətdiyi iddiasından sonra meydanı tərk ediblər.
İdman.Biz BBC Sport-a istinadən xəbər verir ki, hadisə oktyabrın 26-da Bakıda keçirilən C qrupunun matçının son dəqiqəsində baş verib. Bu zaman İrlandiya Respublikası millisi 4:1 hesabı ilə öndə olub.
Hər iki komandanın futbolçuları arasında yaranan mübahisədən sonra İngiltərə yığmasının oyunçularından biri ehtiyat oyunçular skamyasına yaxınlaşaraq məşqçilər korpusuna şikayət edib. Futbolçu rəqib komandanın üzvünün ona qarşı irqçi ifadə işlətdiyini iddia edib.
DAZN platformasında yayımlanan görüntülərdə İngiltərə millisinin məşqçilərinin hadisə barədə baş hakimə məlumat verdiyi və futbolçularını meydandan çıxardıqları əks olunub.
İngiltərə yığmasının baş məşqçisi Mett Torp əvvəlcə hakimi yanına çağırıb. O, baş verənlərlə bağlı məlumat verməyə çalışsa da, hakim "Mən eşidə bilmirəm" cavabını verib.
Bundan sonra İngiltərə millisinin məşqçilərindən biri hakimə müraciət edərək deyib:
"Biz irqçiliklə bağlı şikayət edirik. Oyunu davam etdirmək istəmirik".
Digər rəsmi şəxs qarşılaşmadan sonra hansı addımların atılacağını izah etməyə çalışarkən ingiltərəli məşqçi etirazını təkrarlayıb:
"Xeyr, futbolçularımız oynamaq istəmirlər".
Məşqçilər korpusunun üzvü daha sonra komandanın futbolçularından birinin baş verənlərdən ciddi narahatlıq keçirdiyini söyləyib.
Hadisənin ardınca hər iki komandanın məşqçiləri arasında gərgin mübahisə yaranıb. Tərəflər futbolçularını qorumağa çalışdıqlarını bildiriblər.
FIFA hadisəni araşdırır
Beynəlxalq Futbol Federasiyası (FIFA) qarşılaşmanın dayandırıldığını təsdiqləyib və hadisə ilə bağlı araşdırmaya başladığını açıqlayıb.
FIFA nümayəndəsi BBC Sport-a açıqlamasında deyib:
"FIFA İngiltərə və İrlandiya Respublikası arasında keçirilən U-15 Dünya Çempionatı və Festivalı matçında baş vermiş hadisədən xəbərdardır.
İngiltərə komandasının oyunu davam etdirməkdən imtinasından sonra hakim qarşılaşmanı dayandırıb.
Hazırda rəsmi hesabatlar toplanır. Məsələ müstəqil intizam komitəsinə göndəriləcək və komitə müvafiq vaxtda qərar qəbul edəcək".
BBC Sport məsələ ilə bağlı İngiltərə Futbol Assosiasiyasına və İrlandiya Futbol Assosiasiyasına da müraciət edib.
Hadisə ilə bağlı yekun intizam qərarı hələ açıqlanmayıb. İrqçilik ittihamının doğruluğu da araşdırmanın nəticəsindən sonra müəyyənləşəcək.
Qeyd edək ki, FIFA-nın 15 yaşadək futbolçular arasında dünya çempionatı və festivalı tarixdə ilk dəfə təşkil olunur. Azərbaycanda keçirilən yarışda qurumun 211 üzvündən 189 ölkə və ərazinin komandaları iştirak edir.
