Sport24.az
Azərbaycan millisi UEFA Millətlər Liqasında növbəti oyununu keçirib.
Ayxan Abbasovun baş məşqçisi olduğu komanda D Liqasının 2-ci qrupunda Litva seçməsini qəbul edib və Bakıdakı qarşılaşmadan minimal hesablı qələbə ilə ayrılıb – 1:0.
Nəticə baxımından hər şey qaydasındadır. Millimiz vacib 3 xalı qazanıb və qrupdakı mövqeyini yaxşılaşdırıb. Amma etiraf etmək lazımdır ki, bu qələbə heç də asan başa gəlməyib. Azərbaycan yığması oyun boyu özünü rahat hiss edən, rəqib üzərində tam üstünlük quran komanda təsiri bağışlamayıb.
Əksinə, Litva ilə müqayisədə daha çox əzm göstərdik, daha istəkli olduq və nəticəni də bunun hesabına əldə etdik. Amma "Litvadan daha yaxşı futbol oynadıq" desək, yəqin ki, reallığı olduğundan fərqli təqdim etmiş olarıq.
Son iki oyuna nəzər saldıqda millidə fərdi ustalıq baxımından da ciddi problemlərin olduğu görünür. Futbolçularımızın texniki və taktiki imkanları, xüsusilə topa nəzarət və hücumların qurulması baxımından hələ istənilən səviyyədə deyil. Belə məqamda komandanın əsas üstünlüyü əzmkarlıq və mübarizə olur. Litva ilə oyunda da bunu gördük.
Son iki qarşılaşmada sabit çıxışı ilə seçilən futbolçulardan biri, hətta bəlkə də birincisi Mahir Emreli oldu. Hücumçunun həm mübarizəsi, həm də fərdi keyfiyyətləri millinin ön xəttində özünü daha qabarıq göstərir. Matçın son dəqiqələrində hətta geriyə çəkilərək bir neçə dəfə kritik müdaxilə ilə rəqibdən top "oğurlamaqla" müdafiəyə də kömək edirdi
Təbii ki, hazırkı vəziyyətdə nəticə də az şey deyil. Azərbaycan millisi belə qrupda, D Liqasında mütləq maksimumu hədəfləməli idi. Bunun üçün isə yalnız mübarizə aparmaq kifayət etməyəcək. Komanda xüsusilə özündən aşağı reytinqdə olan rəqiblərə qarşı oyunun diktə edən tərəfi olmağı da öyrənməlidir.
Bunun növbəti sınaqlarından biri səfərdə Lixtenşteynlə keçiriləcək qarşılaşma olacaq.
Millimiz daha əvvəl Bakıda Lixtenşteynlə qolsuz heç-heçə edib. Qrupdakı ilk oyunda isə Kaunasda Litva ilə xalları bölüşmüşdük. İndi qarşıda Lixtenşteynlə səfər görüşü var və bu dəfə ən azı 3 xal götürmək lazımdır.
Əgər Azərbaycan bu qrupdan lider kimi ayrılmaq istəyirsə, belə oyunlarda birinci nömrə ilə oynamağı bacarmalıdır. Xüsusilə də səfərdə Lixtenşteyn kimi rəqibə qarşı.
Litva üzərində qələbə yaxşıdır. Amma bu nəticənin dəyərini artırmaq üçün növbəti addım da atılmalıdır. Çünki məqsəd sadəcə qələbə qazanmaq yox, belə qələbələri daha inamlı və daha keyfiyyətli oyuna çevirməkdir. D Liqasında birinci olmaq imkanını isə demək olar ki, əldən vermişik.
