Idman.biz
Azərbaycan millisinin baş məşqçisi Ayxan Abbasov Lixtenşteynlə oyunda qeydə alınan nəticəni öz üzərinə götürüb.
İdman.Biz xəbər verir ki, mütəxəssis UEFA Millətlər Liqasının qrup mərhələsində Bakıda Lixtenşteynlə qolsuz heç-heçə etdikləri matçdan sonra keçirilən mətbuat konfransında fikirlərini bildirib.
Abbasov qələbə qazanmaq istədiklərini, lakin buna nail ola bilmədiklərini deyib. O, komandanın vəziyyətini daha da çətinləşdirdiyini vurğulayıb:
"Qələbə qazanmaq istəyirdik. Təəssüf ki, buna nail ola bilmədik. Bilirəm ki, vəziyyətimizi daha da çətinləşdirdik. Çıxış yolumuz son iki oyunda qalib gəlməkdir. Qol epizodlarımız oldu, amma çox deyildi. İlk dəqiqədə çox real imkanımız var idi, istifadə edə bilmədik. İstədiyimiz tempi də tam olaraq yarada bilmədik. Günahkar axtarmayacağıq. Futbolçulara da dedim ki, məsuliyyət mənim üzərimdədir. Son iki oyunda mübarizə aparıb qalib gəlmək istəyirik".
Baş məşqçi Lixtenşteynin peşəkar olub-olmamasının müzakirə mövzusu olmadığını, əsas diqqətin öz komandasının çıxışına yönəldilməli olduğunu bildirib:
"Hamınız haqlısınız. Lixtenşteyni məğlub etməli idik. Rəqibin peşəkar olub-olmamasını müzakirə etmək mənə düşmür. Amma biz öz performansımızdan zəif çıxış etdik. Bunu hamı gördü. Çıxış yolu Litva ilə oyunda qalib gəlməkdir".
Abbasov rəhbərliyin onunla bağlı verəcəyi qərara hörmətlə yanaşacağını söyləyib:
"Müqaviləmiz qışa qədərdir. Bura milli komandadır. Biz ən ağır dönəmdə gəldik və çəkinmədən məsuliyyəti üzərimizə götürdük. İndi də məsuliyyətdən qaçmırıq. Rəhbərlik sabah hansı qərarı verərsə, problem yoxdur. Onların qərarı ilə razıyam. Futbolda başqa problemlər də var. Vaxt hər şeyi göstərəcək".
Mütəxəssis Vüsal İsgəndərlinin meydandakı aqressivliyinin normal olduğunu qeyd edib:
"Vüsalı demək ki, yaxşı izləmirsiniz. O, çox istəkli idi. Qələbə qazanmaq istəyiriksə, kompakt müdafiəni yarmaq lazım idi. Vüsalın belə istəkli olması normaldır".
Abbasov Litva ilə oyuna hazırlığın çətin olacağını bildirib:
"Asan deyil, əlbəttə, çətindir. Məsuliyyət mənim üzərimdədir. Səhvlərimizi təhlil edəcəyik. İki gün ərzində həm bərpa olunmalı, həm də rəqibə qarşı hazırlaşmalıyıq. Rotasiyalarımız olacaq. Dörd oyunu eyni heyətlə keçirmək asan deyil. Futbolçular hər şeyi dərk edirlər. Bəlkə də bunlar bizim xeyrimizə olacaq".
Baş məşqçi millidə müəyyən irəliləyişlərin olduğunu, lakin bunun hələ kifayət etmədiyini deyib:
"Tərifləməyəcəyəm. Mən qələbə qazanan komandaya gəlməmişəm. Real danışaq. Özümü qorumuram. Mən komandaya gələndə İslandiya bizə gəzə-gəzə 5 qol vurmuşdu, yoldaşlıq görüşlərində 0:3 hesablı məğlubiyyətlərimiz olurdu. Ən böyükhesablı məğlubiyyətimiz Fransaya qarşıdır. Komandada əzmkarlıq artıb, yeni adlar üzə çıxarırıq. Amma bu da yetərli deyil. Hücumçu problemimiz varsa, bu, yetərli deyil. Zaman lazımdır. Mən oldum, ya başqası oldu, çox şey dəyişməyəcək. Əsas odur ki, millidə istək var, təslim olmurlar. Neçə oyundur uduzmuruq, amma uda da bilmirik. Ən böyük problem budur".
Abbasov millidəki təzyiqin klub futbolundan fərqli olduğunu vurğulayıb:
"Mən gələndən millidə yanaşmada çox fərq var. Klubda bəlli sayda azarkeş olur. Bura klub deyil. Ölkənin bir nömrəli komandasındayıq və burada çox böyük təzyiq var. Biz də buna alışırıq, bu yükü götürmək məcburiyyətindəyik. Bilirdik ki, bu təzyiqlər olacaq. Allah qoysa, öhdəsindən gələrik".
O, Azərbaycan futbolunda gənc futbolçuların yetişdirilməsi ilə bağlı problemlərə də toxunub:
"Uzun söhbətdir. Yerli futbolçu azdır. Orta səviyyəli klublar gənc oyunçulara üstünlük verməlidir. Futbolçuların sayı çox azdır. Aşağıdan başlamalıyıq. Klubların və akademiyaların üzərinə böyük yük düşür. İş gedir. Bilirik ki, əlimizdə olan material budur".
