Idman.biz
Almaniyanın "Ayntraxt Frankfurt" klubu baş məşqçi Dino Toppmöller ilə əməkdaşlığa xitam verib.
İdman.Biz xəbər verir ki, Bundesliqa təmsilçisi bu barədə rəsmi açıqlama yayımlayıb və son günlər mediada yayılan məlumatları təsdiqləyib.
Klub rəhbərliyi qərarın son həftələrdə, xüsusilə də yeni ilin ilk üç oyunundan sonra aparılan geniş idman təhlilinin nəticəsi olduğunu bildirib.
"Ayntraxt"ın idman direktoru Markus Kröşe Toppmöllerin fəaliyyətini yüksək qiymətləndirib. Onun sözlərinə görə, mütəxəssis komandanı yenidənqurma mərhələsindən uğurla çıxararaq beynəlxalq turnirlərə daşıyıb və ötən mövsüm Bundesliqada üçüncü yeri tutmaqla klub tarixinin ən yaxşı nəticəsinə imza atıb. Bununla belə, son dövrdə müşahidə olunan geriləmə fonunda klubun yeni idman impulsuna ehtiyac duyduğu vurğulanıb. Açıqlamada dinamik, aqressiv və kompakt futbol tələblərinin bu mövsüm kifayət qədər yerinə yetirilmədiyi qeyd olunub.
Komandanın müvəqqəti olaraq U-21 komandasının baş məşqçisi Dennis Şmitt və U-19 komandasının çalışdırıcısı Aleksander Mayer tərəfindən idarə olunacağı bildirilib. Əsas məsuliyyətin Dennis Şmittin üzərində olacağı açıqlanıb.
Dino Toppmöller qərardan məyus olduğunu gizlətməsə də, klub rəhbərliyinin seçimini qəbul edib və son iki il yarım ərzində göstərilən əməkdaşlığa görə "Ayntraxt"a təşəkkürünü bildirib.
Xatırladaq ki, UEFA Çempionlar Liqasının əsas mərhələsi çərçivəsində "Qarabağ" - "Ayntraxt" qarşılaşması yanvarın 21-də saat 21:45-də Tofiq Bəhramov adına Respublika stadionunda keçiriləcək.
12:20
Almaniyanın "Ayntraxt" klubunun baş məşqçisi Dino Topmöllerin mövqeyi "Qarabağ"la keçiriləcək oyun ərəfəsində ciddi şəkildə zəifləyib.
İdman.Biz xəbər verir ki, Almaniya mətbuatının məlumatına görə, Bundesliqanın ikinci dövrəsinin ilk turunda "Verder"lə 3:3 hesablı heç-heçə Frankfurt klubunda narazılığı daha da gücləndirib. Klubun idman direktoru Markus Kreşe baş məşqçiyə açıq dəstək verməyərək vəziyyətin dərin təhlilə ehtiyacı olduğunu bildirib.
Kreşe komandanın uzun müddətdir eyni problemlərlə üzləşdiyini vurğulayıb. Onun sözlərinə görə, "Ayntraxt" çox asan qollar buraxır, hücumda həddindən artıq gərgin təsir bağışlayır və oyunda struktur çatışmazlığı var. Klub rəhbərliyi mövcud çıxış səviyyəsindən narazıdır.
Dino Topmöller isə məsuliyyəti üzərinə götürdüyünü etiraf edib. Baş məşqçi komandanın nəticələrindən razı olmadığını və baş verənlərin ilk növbədə onun cavabdehliyi altında olduğunu qeyd edib.
Alman mediası istisna etmir ki, UEFA Çempionlar Liqasının əsas mərhələsində Azərbaycanda "Qarabağ"a qarşı keçiriləcək oyun Topmöller üçün "Ayntraxt"dakı son matç ola bilər. Son yeddi Bundesliqa turunda cəmi bir qələbə və 2026-cı ildə keçirilən üç rəsmi oyunda doqquz buraxılmış qol Frankfurt təmsilçisi üçün Bakı səfərinin əhəmiyyətini daha da artırır.
Xatırladaq ki, UEFA Çempionlar Liqasının əsas mərhələsi çərçivəsində "Qarabağ" - "Ayntraxt" qarşılaşması yanvarın 21-də saat 21:45-də Tofiq Bəhramov adına Respublika stadionunda keçiriləcək.
