Idman.biz
Finalissima matçının Madriddəki "Santyaqo Bernabeu" stadionunda keçiriləcəyi ilə bağlı xəbərlərdən dərhal sonra Argentina tərəfindən gözlənilməz reaksiya gəlib. Tanınmış jurnalist Qaston Edulun verdiyi məlumata görə, Argentina Futbol Assosiasiyası bu təklifi rədd edib.
İdman.Biz xəbər verir ki, Qətərin paytaxtı Dohada keçirilməsi planlaşdırılan matç Yaxın Şərqdəki gərginlik səbəbindən təhlükə altına düşüb. Bu səbəbdən UEFA və İspaniya tərəfi oyunun Madridə köçürülməsini təklif etsələr də, Argentina buna razılıq verməyib.
İmtinanın əsas səbəblərindən biri kimi oyunun Madriddə keçirilməsinin İspaniya millisinə aşkar üstünlük verəcəyi və bunun da finalın neytral meydanda keçirilməsi prinsipini pozacağı göstərilir. Digər səbəb isə Lionel Messinin uzun illər rəqib olduğu "Real"ın stadionuna dönmək istəməməsi və Argentinanın bu titulu daha ədalətli mühitdə qorumaq istəməsidir.
Hazırda oyunun martın 27-də keçirilməsi hələ də sual altındadır. Alternativ variantlar kimi Londonun "London Stadium" arenası, Roma və ya Mayami şəhərləri nəzərdən keçirilir.
16:53
Futbol dünyasının maraqla gözlədiyi Finalissima matçının keçiriləcəyi vaxt və məkan dəqiqləşib. Avropa çempionu ilə Amerika Kubokunun qalibi arasında baş tutacaq möhtəşəm qarşılaşma İspaniyada təşkil olunacaq.
İdman.Biz COPE nəşrinə istinadən xəbər verir ki, Finalissima oyunu martın 27-də Madridin məşhur "Santyaqo Bernabeu" stadionunda keçiriləcək.
Bu qarşılaşmada son Avropa çempionu İspaniya millisi ilə Amerika Kubokunun (Copa America) qalibi Argentina yığması qarşı-qarşıya gələcək. Bu matç həm də dünya futbolunun gənc ulduzu Lamin Yamal ilə əfsanəvi Lionel Messinin rəqib qismində meydanda görüşməsi baxımından böyük maraq kəsb edir.
Qeyd edək ki, sonuncu Finalissima 2022-ci ildə keçirilib və həmin matçda Argentina İtaliyanı 3:0 hesabı ilə məğlub edərək kubokun sahibi olub.
