Sport24.az
Almaniya millisi dünya çempionatına hazırlıq çərçivəsində keçirdiyi yoxlama oyununda Finlandiya yığmasını 4:0 hesabı ilə darmadağın edib. Sport24.az xəbər verir ki, Maynts şəhərində baş tutan qarşılaşmada "bundestim" rəqibi qarşısında böyük üstünlüklə qalib gəlib. Matçın əsas qəhrəmanı isə dubla imza atan hücumçu Deniz Ündav olub.
Oyundan sonra Almaniya millisinin baş məşqçisi Yulian Naqelsmann komandasının nümayiş etdirdiyi futboldan razı qaldığını gizlətməyib:
"Futbolçular tapşırıqları çox yaxşı yerinə yetirdilər. İlk 15 dəqiqədə xüsusilə yüksək səviyyədə oynadıq. İkinci hissədə də müdafiədə etibarlı təsir bağışladıq, həm əks-hücumdan, həm də standart vəziyyətdən qol vurduq. Qapımızı toxunulmaz saxlamağımız bizi sevindirir".
Gənc mütəxəssis iki qol vuran Ündavın oyununu xüsusi vurğulayıb:
"Deniz meydanda çox təhlükəli idi. Vurulan qolların üçündə birbaşa pay sahibi oldu və əla qarşılaşma keçirdi".
Beləliklə, Almaniya millisi mundialın startı ərəfəsində Finlandiya üzərində inamlı qələbə qazanaraq turnirə yüksək əhval-ruhiyyədə yollanıb.
