Adil Şükürov: Qələbənin davamlı olmasını istəyirik və hər kəs ən yaxşısını etməlidir

"Komandanın son mərhələyə yaxın qazandığı hər uğur hamı üçün xoş olur". Bu sözləri Sport24.az-a "Səbail"in baş məşqçisi Adil Şükürov deyib.

Mütəxəssis 17-ci turda "Cəbrayıl"ı 4:1 hesabı ilə üstələdikləri matçla bağlı fikirlərini bölüşüb:

"Təbii ki, bu qələbənin davamlı olmasını istəyirik və bunun üçün də komanda olaraq hər kəs ən yaxşısını etməyə çalışmalıdır. Düşünürəm ki, kollektivin bütün üzvləri üzərlərinə düşən məsuliyyəti dərk edir və bu işin öhdəsindən gələ biləcək gücdə olduqlarını da anlayırlar. Təbii ki, meydana çıxan bütün futbolçuların oyun ərzində qol vurmaq şansı olmaya bilər. Lakin ələ düşən imkandan maksimum yaralanmaq hər kəsin borcudur. Çünki qol vurulanda bütün komandanın o qolda payı var. Son oyunda qeydə alınan nəticə futbolçularda özgüvəni artıracağını düşünürəm".

Şükürovun sözlərinə görə, Birinci Liqada komandaların hansı görüşdə xal qazanacağını və ya hansı oyunda xal itirəcəyini öncədən proqnozlaşdırmaq çətindir:

"Üç xalıq yarışda hər an hər şey dəyişə bilər. Necə ki, bir müddət əvvəl hər kəs "Şahdağ Qusar" komandasının liqada qalmaq uğrunda mübarizə aparacağını düşünürdü. Son müsahibələrdən və komandaya cəlb olunan yeni transferlərdən sonra isə artıq onların elitaya yüksəlmək uğrunda oynadığını görürük. Sona qədər mübarizəni davam etdirmək lazımdır. I Liqada çox olub ki, sona 5-6 tur qalmış hər hansı bir komandanın çempion olacağına heç kəsin şübhəsi qalmayıb. Lakin sonda heç kimin gözləmədiyi halda Premyer Liqaya başqa bir kollektiv vəsiqə qazanıb".

Qeyd edək ki, 17 turdan sonra aktivində 30 xal olan "Səbail" turnir cədvəlinin 4-cü pilləsində qərarlaşıb.