Idman.biz
A Seriyasının prezidenti Etsio Mariya Simonelli İtaliya çempionatının 24-cü turunun "Milan"- "Komo" matçının Avstraliyada keçiriləcəyini təsdiqləyib.
İdman.Biz-in xəbərinə görə, Simonelli "Milan"-"Komo" matçının əvvəlcədən planlaşdırıldığı kimi 8 fevralda Pertdə keçiriləcəyini bildirib.
"Dohada (FIFA prezidenti) İnfantino ilə görüşdüm və həmişə olduğu kimi, çox səmimi söhbət oldu. İrəli sürülən və yerinə yetirilməsi mütləq olmayan bəzi şərtlərlə bağlı bir sıra şübhələrimiz var idi. Məsələn, italyan hakimlərə etibar etməyimizə baxmayaraq, matçın Asiya Federasiyasından olan hakimlərə həvalə edilməsi xahişi kimi.
Lakin (FIFA Hakimlər Komitəsinin sədri) Pyerluici Kollina Asiya hakimlərinin keyfiyyəti ilə bağlı bizi sakitləşdirdi və matçı idarə edə biləcək bir neçə peşəkarın adını çəkdi. Bu ideyanı qəbul etmək ən çətini idi və ən böyük maneə idi. Amma Kollinanın arqumentləri sayəsində hər şeydə razılığa gəldik", - Simonelli "Sport Mediaset"ə verdiyi müsahibədə bildirib.
