Idman.biz
2027-ci ildə Özbəkistanla şərikli keçiriləcək 20 yaşadək (U-20) futbolçular arasında dünya çempionatının (DÇ) Azərbaycanda hansı stadionlarda baş tutacağı bəlli olub.
İdman.Biz prosport.az-a istinadən xəbər verir ki, oyunlar Bakı, Sumqayıt, Gəncə, Qəbələ və Xankəndidə keçiriləcək.
Bakıda məkanın Bakı Olimpiya Stadionu (BOS) və Tofiq Bəhramov adına Respublika stadionu olması yönündə müzakirələr gedir. BOS U-20-lərin DÇ-sində tamaşaçı doldurmaq üçün kifayət qədər böyük olduğundan, 2-ci variant da müzakirə olunur.
Sumqayıtda Mehdi Hüseynzadə adına şəhər stadionu, Qəbələdə şəhər stadionu, Gəncədə yeni açılmış və hələ qazonu üzərində iş görülən Gəncə stadionu və Xankəndidə şəhər stadionu dünya çempionatı üçün nəzərdə tutulub.
Lakin Xankəndidəki stadionda məşq üçün ehtiyat meydançaların olmaması burada oyunun keçirilməməsi üçün səbəb ola bilər. Hər halda, ehtiyat meydançalar salınsa, burada da oyunlar keçiriləcək.
Qeyd edək ki, dekabrın 15-də Azərbaycan Prezidenti İlham Əliyevin Sərəncamı ilə yaradılmış Təşkilat Komitəsinə Xankəndi şəhərində, Ağdərə və Xocalı rayonlarında Azərbaycan Respublikası Prezidentinin xüsusi nümayəndəsi Elçin Yusubov, Gəncə Şəhər İcra Hakimiyyətinin başçısı Niyazi Bayramov, Qəbələ Rayon İcra Hakimiyyətinin başçısı Səbuhi Abdullayev və Sumqayıt Şəhər İcra Hakimiyyətinin başçısı Zakir Fərəcov da daxil edilib.
Onu da bildirək ki, FIFA oktyabrın 2-də keçirdiyi iclasında U-20 DÇ-nin Azərbaycan və Özbəkistana verilməsini təsdiqləyib. Mundialda 24 komandanın 6 qrupda mübarizə aparması gözlənilir.
