Mourinyodan "Benfika" tənqidlərinə Hemilton müqayisəsi ilə cavab

Portuqaliyanın "Benfika" klubunun baş məşqçisi Joze Mourinyo komandasına yönələn tənqidlərə cavab olaraq Formula-1 əfsanəsi Lyuis Hemiltonun karyerasını misal çəkib və klubun tarixi irsinin qısamüddətli uğursuzluqlardan daha önəmli olduğunu vurğulayıb.

İdman.Biz xəbər verir ki, "Braqa" ilə 28 dekabrda keçiriləcək oyundan əvvəl danışan Mourinyo "Sportinq" klubunun prezidenti Frederiku Varandaşın "Benfika" titul yarışına həmişə gec qoşulur" fikrinə etiraz edib.

O bildirib ki, Hemilton son illərdə çempionluq uğrunda mübarizəyə gec qoşulsa da, buna baxmayaraq yeddi dünya çempionluğu qazanıb və bu fakt böyüklüyün ölçüsünün yalnız son mövsümlərlə müəyyən olunmadığını göstərir. Mourinyo əlavə edib ki, "Benfika" da oxşar şəkildə zəngin irsə malikdir.

Qeyd olunur ki, "Sportinq" 2024 və 2025-ci illərdə ardıcıl çempionluqlar qazanaraq uzun fasiləyə son qoyub və bunun fonunda "Benfika"nı geridə qalan klub kimi təqdim etməyə çalışıb. Lakin Lissabon təmsilçisi ölkə çempionatında 38 titul qazanıb ki, bu da "Sportinq"in 21 çempionluğundan xeyli çoxdur. Mourinyo bu statistik fərqin diqqətdən kənarda qala bilməyəcəyini vurğulayıb.

Hemiltonun son mövsümləri daha çətin keçib. O, 2024-cü ildə "Mersedes"lə ümumi sıralamada yeddinci olub və bu, onun karyerasında ən aşağı göstəricidir. 2025-ci ildə "Ferrari"yə keçidindən sonra isə mövsümü altıncı pillədə başa vurub, 156 xal toplayıb və ilk dəfə podiuma yüksələ bilməyib. "Ferrari" də həmin il qələbə qazana bilməyərək "Red Bull", "Maklaren" və "Mersedes"dən geri qalıb.

Mourinyo "Ferrari"ni "Real Madrid"lə müqayisə edərək bildirib ki, bu komandada çıxış etmək həm xəyal, həm də böyük məsuliyyətdir:

"Ferrari Formula-1-in "Real Madrid"i kimidir. Ağ formanı geyinən kimi "artıq 1:0 irəlidəsən" deyirlər. Qırmızı da eyni hissdir, həm şərəf, həm də ağır yük."

Baş məşqçi hesab edir ki, bu paralel "Benfika"ya da aiddir: indiki çətinliklər keçicidir, amma tarix və böyüklük qalıcıdır.