Idman.biz
"UFC-nin Bakıya gəlişi Azərbaycanın idman tarixində yeni bir səhifə açır".
İdman.biz xəbər verir ki, bunu Bakı Şəhər Halqası Əməliyyat Şirkətinin baş direktoru Maqsud Fərzullayev deyib.
O, Bakıda keçiriləcək "UFC Fight Night" turnirinin biletlərinin satışının bu gün başlaması haqda fikirlərini bildirib: "Azərbaycan beynəlxalq miqyaslı tədbirlərə uğurla ev sahibliyi edir. UFC ilə tərəfdaşlıq ölkəmizin illərdir ki, idman sahəsindəki dinamik inkişafının, ölkə rəhbərliyinin uğurlu idman siyasətinin məntiqi davamıdır. Turnirin təşkili prosesində dəstəyini əsirgəməyən bütün tərəfdaş və sponsorlara təşəkkürünü bildirirəm".
Fərzullayev Bakıda keçiriləcək daha bir mötəbər tədbirə — "Formula 1" Azərbaycan Qran-prisinə bilet satışına da toxunub: "Yarışa 5 aydan az zaman qalıb. Hazırlıq sürətlə davam edir. Nəticələr gözlənildiyindən daha yüksəkdir. Bilet alan azarkeşlərin 80 faizdən çoxunu xarici vətəndaşlar təşkil edir".
Qeyd edək ki, Bakı Kristal Zalında baş tutacaq "UFC Fight Night" iyunun 21-də, Azərbaycan Qran-prisi sentyabrın 19-21-də keçiriləcək.
İdman.biz
