Idman.biz
"Formula-1" üzrə yeddiqat dünya çempionu Lyuis Hemilton "Ferrari"dəki komanda yoldaşı Şarl Leklerlə aralarında yaranan gərginliyin aradan qaldırıldığını açıqlayıb.
İdman.Biz "GPblog" nəşrinə istinadən xəbər verir ki, britaniyalı pilot Braziliya Qran-prisindən sonra komanda rəhbəri Frederik Vassörün təşəbbüsü ilə keçirilən görüşün detallarını bölüşüb.
Pilotlar arasında narazılıq Meksika Qran-prisinin ilk dövrəsində yaşanan insidentdən sonra yaranıb. Lekler dördüncü döngədə Hemiltonu xarici trayektoriya ilə ötməyə çalışarkən hər iki pilot trasdan kənara çıxıb. Monakolu sürücü otluq sahədən keçərək komanda yoldaşının önündə yarışa qayıdıb.
Bu mübarizədən Maks Ferstappen yararlanaraq yarışı qazanıb. Lekler isə trasdan kənarda üstünlük əldə etdiyinə görə beş saniyəlik cərimə alıb.
Hadisədən narazı qalan Hemilton "Ferrari" pilotları arasında trasdakı mübarizəni tənzimləyən qaydaların daha dəqiq müəyyənləşdirilməsini tələb edib.
Braziliya Qran-prisindən əvvəl Vassör hər iki pilotu görüşə çağıraraq komandanın maraqlarının şəxsi rəqabətdən üstün tutulmasının vacibliyini vurğulayıb.
Hemilton görüşün necə keçdiyini belə izah edib:
"Artıq hər şey qaydasındadır. Fred bizi bir araya gətirdi. Görüşdə çox yaxşı vasitəçilik etdi, sonra isə məni və Şarlı tək buraxdı ki, məsələləri öz aramızda müzakirə edək. Açıq və səmimi söhbətimiz oldu. Hər şey yolundadır, artıq diqqətimizi qarşıdakı yarışlara yönəldirik".
Britaniyalı pilot San-Paulu Qran-prisində üzləşdiyi çətinliklərdən də danışıb. O, ilk dövrədə təxminən 11 pillə irəliləsə də, sonradan arxa təkərlərin sürətlə aşınması səbəbindən bolidin idarəetməsində ciddi problemlər yaşayıb.
Yarışın sonlarına yaxın yenidən başlayan yağış britaniyalı pilotun fırlanmasına da səbəb olub. Hemilton birinci döngədə trasın nə qədər islandığı barədə vaxtında məlumat almadığını söyləyib.
Bütün çətinliklərə baxmayaraq, təcrübəli pilot komandasının əməyini yüksək qiymətləndirib və "Ferrari"nin Konstruktorlar Kubokunda ikinci yeri qorumasının vacibliyini vurğulayıb.
"İkinci pilləni qorumaq üçün çalışmalıyıq. Çünki bu nəticə fabrikdə çalışan hər kəs üçün böyük əhəmiyyət daşıyır. Onlar buna layiqdirlər".
