Lent.az
"Liverpul"un keçmiş baş məşqçisi Yurgen Klopp, "Mançester Siti" "şəhərlilər"in xeyrinə iki liqa titulundan məhrum edilərsə, Malorkadakı evində parad təşkil edəcəyinə söz verib.
Lent.az-ın xarici mediaya istinadla xəbərinə görə, "Mançester Siti" daha əvvəl 2009-2018-ci illər arasında 100-dən çox maliyyə pozuntusunda ittiham edilib.
"Şəhərlilər" günahkar bilinərsə, klub xalların silinməsi, Premyer Liqadan qovulması və dörd liqa titulunun itirilməsi də daxil olmaqla bir sıra cəzalarla üzləşə bilər.
"Liverpul" araşdırılan dövrdə iki dəfə - 2014-cü ildə Brendan Rocersin və 2019-cu ildə Yurgen Kloppun rəhbərliyi altında Premyer Liqada "Mançester Siti"dən sonra ikinci olub.
"Mən "Liverpul"dan ayrılarkən bunu müzakirə etdik. Bilirsiniz, mən Malorkadakı evimdə çox vaxt keçirmirəm, çünki dünyanı çox gəzirəm. Əgər "Mançester Siti"nin titullarından məhrum ediləcəyi və mersisaydlıların çempion elan edildiyi bir vəziyyət yaranarsa, sadəcə Malorkaya uçuş sifariş etmək istəyən hər kəsə deyəcəyəm ki, onlara pivə alacağam. Nəyi qeyd etməyi planlaşdırırıqsa, onu da edəcəyik. Mənim bağımda öz paradımız olacaq. Gözləyək. Ümumiyyətlə, mən bütün bu vəziyyəti izləmirəm", - Klopp deyib.
Yurgen Klopp 9 il çalışdıqdan sonra 2024-cü ilin yayında "Liverpul"u tərk edib.
Onun rəhbərliyi altında mersisaydlılar Premyer Liqa, İngiltərə Kuboku və Super Kuboku, Liqa Kuboku, UEFA Super Kuboku və FIFA Klublararası Dünya Kuboku da daxil olmaqla bütün əsas turnirlərin qalibi olublar.
Ümumilikdə, "Liverpul" Kloppun rəhbərliyi altında 489 oyun keçirib, 304-də qalib gəlib, 100-də heç-heçə edib və 85-də uduzub. Kloppun klubdakı yerini əvvəllər "Feyenoord"a rəhbərlik edən hollandiyalı mütəxəssis Arne Sloot tutub.
Bu ilin yanvarında Klopp "Red Bull"un qlobal futbol bölməsinin rəhbəri vəzifəsini tutub. 57 yaşlı almaniyalının bu vəzifədə ildə təxminən 12 milyon avro qazanacağı bildirilir.
