Idman.biz
İngiltərə Çempionşipində oynayan "Birminhem Siti" klubunun sahibi və NFL əfsanəsi Tom Bredi, iti Cuninin ölən köpəyi Luanın klonu olduğunu açıqlayıb.
İdman.Biz-in məlumatına görə, Bredi klonlaşdırmanın Dallasda yerləşən və investisiya qoyduğu "Colossal Biosciences" şirkəti tərəfindən həyata keçirildiyini söyləyib.
Amerikalı bir neçə il əvvəl mütəxəssislərin Luadan qan nümunəsi götürdüklərini və bunun nəticəsində genetik surətin yaradıldığını qeyd edib. Bredi, bunun ailəsi üçün 2023-cü ildə itirdikləri sevimli ev heyvanını yenidən görmək üçün bir fürsət olduğunu deyib. O, bu texnologiyanın ev heyvanlarını itirən ailələrə təsəlli verə biləcəyini və nəsli kəsilməkdə olan növlərin qorunmasına kömək edə biləcəyini vurğulayıb.
"Colossal Biosciences" təkcə Bredinin açıqlamasını deyil, həm də yüksək səviyyəli müştərilər üçün ev heyvanlarını klonlaşdırmaqla tanınan "Viagen Pets and Equine" şirkətini satın aldığını da təsdiqləyib. Bu cür xidmətlər əvvəllər Barbara Streyzand və Peris Hiltonu göstərilib. Mediada yayılan məlumatlara görə, "Viagen"in it klonlaşdırmasının qiyməti 50.000 ilə 85.000 dollar arasında dəyişir.
"Colossal", tüklü mamont və dodonun geri qaytarılması planları da daxil olmaqla, nəsli kəsilmiş növlərin bərpası layihələrində fəal iştirak edir. Bu yaxınlarda üç nəsli kəsilmiş direvolf balasının klonlaşdırılmasını elan edib.
2023-cü ildə karyerasını bitirən Tom Bredi biznes və idman layihələri ilə fəal məşğul olur. O, "Birminhem Siti" klubunun minoritar sahibidir və həmçinin Amerika futbolu komandasında paya malikdir. "Birminhem Siti" oyunçularının sözlərinə görə, NFL əfsanəsi onları şəxsən dəstəkləyir və onlara klub seçməyə kömək edir ki, bu da yeni oyunçulara ilham verir.
Bredinin klubu Çempionşipdə turnir cədvəlinin yuxarı hissəsindədir.
