Report.az
Mariya Stadnik kimi idmançılar dünyaya nadir hallarda gəlir.
Bunu "Report"a açıqlamasında Azərbaycanın qadınlardan ibarət güləş millisinin baş məşqçi əvəzi Toğrul Əsgərov deyib.
Olimpiya və Avropa çempionu Azərbaycan güləşinin əfsanəsi Mariya Stadnikin karyerasını bitirməsi ilə bağlı təssüratların bölüşüb:
"Sevindirici haldır ki, Azərbaycan bayrağını dünya arenalarında qaldırdı və buna görə ona təşəkkür etməliyik. Mariya yenə də bizimlədir, komandaya kömək edir. Bilirsiniz ki, komandamız yeniyetmə və gənc qızlardan ibarətdir. Hamımız maksimum şəkildə əl-ələ verib yeni Mariya Stadniklər yetişdirməyə çalışırıq. Dünya qadın güləşinə nəzər salsaq, onun kimi güləşçilər cəmi bir neçə nəfərdir. Belə idmançılar planetdə seçilmiş insanlardır".
Mütəxəssis Azərbaycanda Stadnik kimi güləşçilər yetişdirməyə çalışdıqlarını vurğulayıb:
"Zalda 40 idmançı məşq edir. İndidən kiminsə haqqında dəqiq nəsə desək, sabah gözlədiyimiz olmaya bilər. Bəzən isə gözləmədiyin bir insan 2-3 il ərzində parlayır. Bütün komandaya eyni baxırıq, kimlərinsə adını xüsusi şəkildə çəkmək istəməzdim. Çalışırlarsa, məşq edirlərsə, yetişməlidirlər. Əlbəttə, demirəm ki, sabah mütləq kimsə yetişəcək. Gəncdirlər, bir neçə il sonra özlərini göstərməlidirlər. Bunun üçün nazirlik də dəstək olur, Milli Olimpiya Komitəsi də. Ən əsası federasiya rəhbərliyi də qadın güləşinə xüsusi diqqət ayırır. Arzu edək ki, Mariya səviyyəsində azərbaycanlı idmançılar yetişsin. Bunun üçün də bir neçə məşqçi çalışır. Komandaları U-15, U-17, U-20, U-23 və böyüklərdən ibarət kateqoriyalara bölmüşük".
Qeyd edək ki, Mariya Stadnik ikiqat dünya və onqat Avropa çempionu, olimpiadanın iki gümüş və iki bürünc mükafatçısıdır.
