Idman.biz
"Reqata çox gərgin mübarizə şəraitində keçdi. Bu səbəbdən son dərəcə soyuqqanlı şəkildə öz performansımızı göstərdik".
İdman.biz xəbər verir ki, bunu AZƏRTAC-a açıqlamasında Ümummilli Lider Heydər Əliyevin anadan olmasının 101-ci ildönümünə həsr edilən "Prezident Kuboku-2024" reqatasında qızıl medal qazanan Azərbaycan avarçəkəni Əlimurad Hacızadə deyib.
Birnəfərlik kayak qayığında 1000 metr məsafəyə mübarizədə fəxri kürsünün ən yüksək pilləsinə qalxan idmançı çıxışından razı qaldığını söyləyib: "Yarış ərzində əlimdən gələni etdim. Rəqiblərim hər il qarşılaşdığım idmançılar idi. Lakin buna baxmayaraq, bu dəfə özümü daha yaxşı tərəfdən göstərdim. Ötən illə müqayisədə daha yaxşı çıxış edərək, öz bacarığımı nümayiş etdirdim".
O, növbəti hədəflərindən də söhbət açıb: "Qarşıda bizi Slovakiya və Çexiya reqatası, MDB Oyunları gözləyir. Bu yarışlara da yüksək səviyyədə hazırlaşamaq üçün əlimizdən gələni edəcəyik".
Qeyd edək ki, Azərbaycan avarçəkənləri turniri 15 medalla başa vurublar.
