Idman.biz
UFC 330 turnirinin əsas döyüşündə üz-üzə gələcək İslam Mahaçev və İan Maçado Qarri qarşılaşma öncəsi öz üstünlüklərindən danışıblar. Yarımorta çəki üzrə çempionluq kəmərinin ortaya qoyulacağı görüş avqustun 15-də Filadelfiyada keçiriləcək.
İdman.Biz xəbər verir ki, İslam Mahaçev rəqibi üzərində nəzarəti ələ alacağına və döyüşü erkən başa vura biləcəyinə inandığını bildirib.
"Bizdən çox heç kim məşq etmir. Mən təkcə qrappler deyiləm, dünyanın ən yaxşı döyüşçüsüyəm. Bütün bacarıqlarımdan istifadə edəcəyəm. İan bu idmanın yeni nəslidir, gəncdir. O, UFC dünya çempionu olmaq istəyir. Onun çox yaxşı döyüş üslubu var, amma biz öz planımızı davam etdirməliyik", - deyə Mahaçev söyləyib.
UFC çempionu Dağıstan güləşinin üstünlüyünə də diqqət çəkib:
"Bu döyüşü mən nəzarətdə saxlayacağam. Dağıstan güləşi dünyanın ən yaxşısıdır. Onu ilk raundda məğlub edə bilərəm. Döyüşdən əvvəl hamı məni məğlub edəcəyini deyir, amma sonda bu, heç vaxt işləmir".
İan Maçado Qarri isə Mahaçevin indiyədək onun fiziki göstəricilərinə və hərəkətliliyinə malik rəqiblə qarşılaşmadığını bildirib:
"İslam heç vaxt mənim qədər uzunboylu və gənc biri ilə qarşılaşmayıb. Üstəlik, mənim kimi hərəkət edən biri ilə də heç vaxt döyüşməyib. Mən onu məğlub edəndə heç bir bəhanə olmayacaq. İan Qarri dünyanın ən yaxşı döyüşçüsüdür, vəssalam".
İrlandiyalı döyüşçü bu qarşılaşmanın onun karyerasında xüsusi yer tutduğunu da vurğulayıb:
"Bu döyüş gördüyüm bütün işlərin zirvəsidir. Heç bir halda, heç bir şəraitdə həmin oktaqondan belimdə o kəmər olmadan çıxa bilmərəm".
