Azərbaycan çempionatının üçüncüsü avrokuboklara qatılmayacaq

Qadın voleybolçulardan ibarət Azərbaycan Yüksək Liqasının bürünc mükafatçısı olan "Milli Aviasiya Akademiyası" bu il avrokuboklarda iştirak etməyəcək.

Bunu "Report"a açıqlamasında komandanın baş məşqçisi Emin Əbilov deyib.

O, rəhbərliklə müzakirələrdən sonra belə qərara gəldiklərini diqqətə çatdırıb:

"Dünya çempionatlarında, olimpiadalarda, avrokuboklarda iştirak etmək hər bir məşqçinin və klubun arzusudur. Əlbəttə, biz də bunu istərdik. Lakin rəhbərliklə müzakirələr aparmışıq, hələ ki, belə planımız yoxdur. Azərbaycan çempionatına hazırlaşacağıq. Ümid edirəm ki, növbəti mövsümlərdə avrokuboklara da qatılarıq".

37 yaşlı mütəxəssis çempionatın gərgin və maraqlı keçdiyini söyləyib:

"Bu il bir-birindən gərgin və maraqlı oyunlar keçdi. UNEC-i çıxmaq şərtilə digər komandaların gücləri, demək olar ki, bir-birinə yaxın idi. Komandamız mövsüm ərzində yaxşı mübarizə apardı, vacib qələbələr qazandıq. "Abşeron" müntəzəm mövsümü birinci bitirdi. Cəmi iki məğlubiyyətləri var idi. Hər ikisi də bizə qarşı oyunda oldu. Finalda oynaya biləcək komandamız var. Təəssüf ki, aparıcı oyunçularımızdan biri zədələndi və nəticədə gücümüz bir qədər azaldı. Buna baxmayaraq, yarımfinalda "Azərreyl"lə yaxşı mübarizə apardıq. İlk oyunda uduzsaq da, cavab matçında qələbə qazandıq. Yalnız "qızıl set"də uduzduq. Üçüncü yer uğrunda "Gəncə" ilə qarşılaşdıq və iki oyunda qələbə qazanaraq bürünc medala yiyələndik".

E.Əbilov növbəti mövsümdən çempionluq uğrunda mübarizə aparacaqlarını bildirib:

"Əlbəttə, bu son deyil. Komandanı daha da gücləndirməli və növbəti mövsüm qızıl medal uğrunda mübarizə aparmalıyıq. Əziyyəti keçən hər kəsə təşəkkür edirəm. Federasiya çempionatı çox yaxşı təşkil etmişdi. Klub rəhbərliyi bizə mövsüm boyunca dəstə və qayğı göstərdi. Azarkeşlərə təşəkkür edirəm, onlara bacardığımız qədər gözəl voleybol göstərdik".

Qeyd edək ki, "Milli Aviasiya Akademiyası" üçüncü yer uğrunda mübarizədə "Gəncə"ni hər iki oyunda məğlub edərək bürünc medallara yiyələnib.