ACF rəsmisi: "Cüdoçuların Parisdə keçirilən "Böyük Dəbilqə"dəki çıxışını yaxşı qiymətləndiririk"

Cüdoçularımızın "Böyük Dəbilqə"dəki çıxışını yaxşı qiymətləndiririk.

Bunu "Report"a açıqlamasında Azərbaycan Cüdo Federasiyasının (ACF) icraçı vitse-prezidenti Rəşad Rəsullu deyib.

O, Azərbaycan idmançılarının Fransanın paytaxtı Parisdə keçirilmiş turnirdəki nəticələri ilə bağlı fikirlərini bölüşüb:

"Yarışa qatılan 10 cüdoçudan 3-ü medal əldə etdi. İkisi beşinci yeri tutdu. Medal görüşlərində məğlub oldular. Ümimilikdə yığmanın çıxışını yaxşı qiymətləndiririk. Hər idmançının performansını ayrı-ayrı dəyərləndirdikdə imkanlarından zəif təsir bağışlayan oldu. Bəziləri üçün ilk böyük turnir idi. Böyük təcrübə qazandılar. Millinin baş məşqçisi Riçard Trautman müsahibəsində də hazırda diqqəti yeni nəslin yetişməsinə, onların yoxlanılmasına yönəltdiyimizi vurğulamışdı. Bu baxımdan hesab edirəm ki, federasiya bu yarışda qarşıya qoyulan məqsədlərə çatdı. Hansı istiqamətdə işlərin düz getdiyini və çatışmazlıqların harada olduğunu görürük. Bunun əsasında da gündəlik işləri tənzimləyəcəyik. "Böyük Dəbilqə" bir çox gənc cüdoçularımız üçün sınaq turniri idi. Kimsə bundan çox əla istifadə etdi. Kimsə yararlana bilmədi və potensialından aşağı çıxış etdi. Bunların hamısı dəyərləndiriləcək və müzakirə olunacaq".

ACF rəsmisi qızıl medal qazanan Ruslan Paşayev (66 kq) haqqında da danışıb:

"O, kifayət qədər istedadı və potensialı olan idmançıdır. Zədələr ötən il olimpiadada iştirakına mane oldu. Məşqçilər heyəti əmin idi ki, Ruslan da lisenziya əldə edəcək. Amma zədələr imkan vermədi. İndi isə tam sağlamdır, hazırdır. Yarışdan-yarışa artırır. Müəyyən məsələlər var ki, bunları tənzimləməlidir. Məşqçilər heyəti də bunu yaxşı bilir. Hesab edirəm ki, 66 kq-da bizim əsas namizədlərdən biri ola bilər. Amma bu çəkidə Yaşar Nəcəfov, Rəşad Yelkiyev, Elşən Əsədov da var. Gənclərdə Məhəmməd Musayevi də qeyd etmək istəyirəm. Bu çəkidə rəqabət kifayət qədərdir. Bizim istəyimiz rəqabətin yüksək səviyyədə olmasıdır".

Qeyd edək ki, "Böyük Dəbilqə"də Ruslan Paşayev (66 kq) qızıl, Rəşid Məmmədəliyev (73 kq) və Ömər Rəcəbli (81 kq) bürünc mükafat əldə edib.