Idman.biz
20-ci dəfə dünya çempionatlarında çıxış edir.
İdman.biz xəbər verir ki, bu nailiyyətə isveçrəli hokkeyçi Andres Ambühl imza atıb.
O, buzüstü hokkey üzrə dünya çempionatlarında iştirak etdiyi turnir və matçların sayına görə rekorda sahibdir.
İsveçrə millisinin forvardı İsveç və Danimarkada start götürən "2025 IIHF World Championship" yarışında Çexiya ilə görüşdə (4:5) çıxış edib.
"Davos" klubunun kapitanı qatıldığı dünya çempionatlarının sayına görə 2022-ci ildə müəyyənləşdirdiyi rekordu yeniləyib. Bu göstəricidə ikinci yeri onun həmyerlisi Matias Seqer (16 turnir) tutur. Ambühl ilk dəfə 2004-cü ilin mundialında iştirak edib.
41 yaşlı hokkeyçi həm də dünya çempionatlarında oyun sayına görə də rekordçudur. Çexlərlə qarşılaşma onun turnirlərdəki 142-ci matçı olub. İkinci yerdə 119 oyunla alman Udo Kiesslinq qərarlaşıb.
İsveçrəlinin hesabında mundiallarda 66 xal (28+38) və 2013 və 2024-cü illərdə qazandığı gümüş medallar var. O, zədə səbəbindən komandasının ikinci yeri tutduğu 2018-ci il turnirini buraxıb.
Ambühl daha əvvəl cari mövsümün onun karyerasında sonuncu olacağını bildirmişdi.
İdman.biz
