İdman.biz
"Bu yarışda layiqincə çıxış etməyə çalışacam".
Bunu İdman.bizə Azərbaycan millisinin cüdoçusu Vüqar Talıbov (90 kq) deyib.
O, sentyabrın 13-15-də Xorvatiyanın paytaxtı Zaqrebdə keçiriləcək Qran-pri barədə danışıb. Talıbov bildirib ki, Olimpiadadan sonra bu cür qran-prilər daim təşkil olunur: "Bu yarışda yüksək nəticə əldə etmək üçün yaxşı hazırlaşmışam. Əlimdən gələni edəcəm ki, qızıl medal qazanım. Əsas məqsədim məhz qızıl medaldır. Öz çəkimdə reytinq üzrə birinci yerdəyəm. Bu da mənə yarış öncəsi əlavə motivasiya və güc verir. İnanıram ki, liderliyimi daim qoruyub, saxlayacam. Böyük arzularım var. Hər birinə çatmaq üçün addım-addım irəliləyəcəm".
Qeyd edək ki, turnirdə ölkəmizi Vüqar Talıbovla yanaşı, Turan Bayramov, Əhməd Yusifov (hər ikisi 60 kq), Ruslan Paşayev, Nazir Talıbov (hər ikisi 66 kq), İbrahim Əliyev, Nəriman Mirzəyev (hər ikisi 73 kq), Ömər Rəcəbli, Zaməddin Poladov (hər ikisi 81 kq), və İmran Yusifov (+100 kq) təmsil edəcək.
Banuçiçək Hüseynli
İdman.biz
