Idman.biz
Meksikanın Qvadalaxara şəhərində başa çatan cüdo üzrə Qran-pri turnirində Azərbaycan cüdoçusu Uşangi Kokaurinin (+100 kq) qələbəsi yarışın ən böyük və xoş sürprizlərindən biri oldu.
Bu uğur gürcü əsilli idmançının karyerasında ilk belə titul olub. İndiyədək onun ən böyük nailiyyəti 2018-ci ildə Bakıda keçirilən dünya çempionatının gümüş medalı idi.
İdman.Biz təxminən on ildir cüdo üzrə Azərbaycan millisinin heyətində çıxış edən Uşangi Kokauri ilə həmsöhbət olub.
- Uşangi, 2018-ci ildəki dünya çempionatının gümüş medalından sonra uzun müddət qalib gələ bilmirdin. İndi isə ikiqat olimpiya çempionunu finalda məğlub edərək Qran-pridə birinci oldun. Səmimi de, finaldan əvvəl qələbəyə inanırdınmı? Qran-prini qazana biləcəyini nə vaxt hiss etdin?
- Açığı, bu mənim ilk Qran-pri qızılımdır və çox xoşbəxtəm. Bu anı çoxdan gözləyirdim - Qran-pridə, "Böyük Dəbilqə" və digər yarışlarda qalib gəlmək istəyirdim, amma indiyə qədər alınmırdı. Yəqin ki, tam hazır deyildim.
İndi vəziyyət tamamilə fərqlidir - həm məşqçilər, həm də federasiya mənə tam dəstək olur. Maksimum nəticə qazanmaq üçün hər şey edilir. Artıq bunun bəhrəsini görməyə başlamışıq və bu, məni çox sevindirir.
- Siz Krpalek kimi güclü rəqibləri məğlub edirsiniz, amma bəzən sizə nisbətən zəif cüdoçulara uduzursunuz. Bunun səbəbi nədir?
- Bəli, güclü rəqibləri məğlub edə bilirəm, amma bəzən zəiflərə uduzuram. Bunun əsas səbəbi əvvəl lazımi formada olmamağım idi - çoxsaylı zədələr buna mane olurdu. İndi isə formamı bərpa edirəm və hər şey yaxşı istiqamətdə gedir.
- Bu sual məni demək olar, 10 ildir düşündürür. Niyə tez-tez gürcü cüdoçularına uduzursunuz? Hətta deyirlər ki, gürcü olduqları üçün siz guya onlara bilərəkdən güzəşt edirsiniz...
- Mən deməzdim ki, daim gürcülərə uduzuram. Axı artıq 3-4 gürcü cüdoçusuna qalib gəlmişəm. Mən heç vaxt Gürcüstan komandasından olan zəif rəqiblərimə uduzmamışam! Bu baxımdan sual bir qədər düzgün deyil. Bəzən qələbəyə çox yaxın oluram, sadəcə alınmır. Bilirsiniz ki, mən zəif idmançı deyiləm, dünyanın ən güclü komandalarından birini təmsil edirəm. Üstəlik, tək mən yox, digər azərbaycanlı cüdoçular da bəzən gürcülərə uduzur. Yəni bu, sadəcə idmandır.
- Ölkəmizdə bu çəki dərəcəsində hələ də rəqibsizsiniz, yoxsa artıq sizə çətinlik yarada biləcək gənclər yetişir?
- Uzun müddət bu çəki dərəcəsində ciddi rəqabət yox idi, idmançı az idi. Halbuki, inkişaf üçün güclü rəqiblərin çoxluğu vacibdir. Əsas problem də bu idi. İndi isə çox güclü gənclər yetişir. Gələcəkdə onlar mütləq nəticə göstərəcəklər. Əminəm ki, bu çəki dərəcəsi Azərbaycanda çox uğurlu olacaq.
- Gələn il dünya çempionatı yenidən Bakıda keçiriləcək. Yarışa qədər çıxışınızı davam etdirməyi planlaşdırırsınızmı? Əgər belədirsə, hansı nəticəni hədəfləyirsiniz?
- Bəli, gələn il keçiriləcək dünya çempionatında iştirak etməyi planlaşdırıram. Məqsədim sadəcə orada olmaq yox, medal uğrunda mübarizə aparmaqdır. Allahın köməyi ilə hər şeyin yaxşı alınacağına inanıram.
Məşqçilər və federasiya ilə birlikdə ən yüksək nəticə üçün əlimizdən gələni edəcəyik. Onların dəstəyi bizə əlavə motivasiya verir. Rəqabətin artması isə yalnız müsbət haldır - bu bizi daha da güclü edir.
- Siz uzun illərdir Azərbaycanı təmsil edirsiniz, elə Zelim Kotsoyev kimi. Amma o, artıq müsahibələrini Azərbaycan dilində verir. Bəs siz nə vaxt belə edəcəksiniz?
- Heç kim məndən Azərbaycan dilində müsahibə istəməyib. Dəqiq deyə bilmərəm, bu nə vaxt baş verəcək, amma Azərbaycan dilində cavab verməyi bacarıram.
Vüqar Vüqarlı
