Riçard Trautman Quba toplanışını və İslam Oyunlarına hazırlığı dəyərləndirdi

Cüdo üzrə Azərbaycan millisinin performans direktoru və kişilərdən ibarət yığmanın baş məşqçisi Riçard Trautman Cüdo Federasiyasının mətbuat xidmətinə müsahibə verib.

İdman.biz xəbər verir ki, mütəxəssis Qubada təşkil olunan təlim-məşq toplanışını dəyərləndirib.

- Qubada təşkil olunan təlim-məşq toplanışının əsas məqsədi nədir?

- Dünya çempionatından sonra geniş hazırlıq mərhələsini yekunlaşdırdıq və idmançılar üçün istirahət vacib idi. İndi isə uzun yay dövründə formaya qayıtmaq üçün ən uyğun məkan Quba oldu. Bakıda hava çox istidir. Yer dəyişikliyi isə idmançıların motivasiyasını artırır. Burada hava təmizdir, dağlara qalxmaq da mümkündür. Toplanış bizim üçün faydalı oldu.

- Daha çox fiziki, yoxsa texniki-taktiki hazırlığa fokuslanırsınız?

- Əsas diqqətimiz fiziki hazırlığa yönəlib. Amma bu zamandan effektiv şəkildə yararlanaraq ne-vaza üzrə də inkişaf etməyə çalışırıq. Bu istiqamətdə çox işləyirik və deyə bilərəm ki, idmançılarımız özlərini yaxşı tərəfdən göstərdilər.

- Toplanış hansı yarışlara hazırlıq məqsədi daşıyır?

- Bu, İslam Həmrəylik Oyunlarına uzunmüddətli hazırlığımızın ilk mərhələsidir. Təbii ki, bu mərhələdə bəzi Qran-pri yarışlarında da iştirak edəcəyik. Amma xüsusi hazırlıq olmadan. Əsas hədəfimiz İslam Oyunlarıdır. Bu toplanışdan sonra Bakıda daha üç həftə məşqlərimizə davam edəcəyik. Ardından Braziliyada iki həftəlik ümumi hazırlıq keçəcəyik.