Idman.biz
"Yarışa tam hazır deyildim. Şükürlər olsun ki, gümüş medal qazandım".
İdman.biz AZƏRTAC-a istinadən xəbər verir ki, bu sözləri Almaniyanın Reyn-Rur regionunda keçirilən Ümumdünya Yay Universiadasında gümüş medal qazanan Azərbaycan cüdoçusu Elcan Hacıyev jurnalistlərə açıqlamasında deyib.
Doxsan kiloqram çəki dərəcəsində fəxri kürsünün ikinci pilləsinə qalxan idmançı çəki saldığı üçün qızıl medal qazana bilmədiyini söyləyib: "Bu ərəfədə yarışlar çox oldu. Bir ay öncə dünya çempionatında çıxış etdim. Daha sonra İspaniyada bir yarış keçirildi. Çox çəki saldım. Ona görə də bu gün final görüşündə yorğunluq var idi".
O, finalda uduzduğu Cənubi koreyalı rəqibi Kim Conqhudan növbəti yarışlarda qisas alacağını bildirib: "Onunla ilk dəfə üz-üzə gəlirdim. Qarşıda yarışlar olacaq. Bu dəfə hazır deyildim. Növbəti yarışlarda ondan qisasımı alacağam".
Qeyd edək ki, hazırda Azərbaycanın aktivində 4 medal var. Elcan Hacıyevdən əvvəl bədii gimnastika üzrə qrup hərəkətləri komandası iki qızıl və bir gümüş mükafat əldə edib.
İdman.biz
