Idman.biz
Müxtəlif çəki dərəcələrində cüdo üzrə dünya reytinqləri yenilənib.
İdman.biz xəbər verir ki, hazırda reytinq cədvəlində birinci yeri qoruyub saxlayan yeganə azərbaycanlı cüdoçu Olimpiya çempionu Hidayət Heydərovdur (73 kq).
Eyni zamanda, Budapeştdə son dünya çempionatında qalib gəlmiş yaponiyalı idmançılar - Ryucu Naqayama (60 kq), Takaeshi Takeoka (66 kq) və Sanshiro Murao (90 kq) üç çəki dərəcəsində liderlik edirlər.
Reytinqlərdə zirvəyə yüksələn digər iki idmançı isə Beynəlxalq Cüdo Federasiyasının bayrağı altında çıxış edən Timur Arbuzov (81 kq) və Matvey Kanikovskidir (100 kq) – onlar da Macarıstanın paytaxtında keçirilən mundialda qızıl medal qazanıblar.
Bundan başqa, super ağır çəki dərəcəsində (+100 kq) neytral statusda çıxış edən dünya çempionu İnal Tasoyev də reytinqdə 1-ci mövqedə qərarlaşıb.
Beləliklə, Heydərov hazırkı reytinqlərdə yeganə idmançıdır ki, son dünya çempionatında uğursuz çıxış etməsinə baxmayaraq, liderliyini qoruyub saxlayıb. Qalan bütün liderlər isə son dünya çempionlarıdır.
İdman.biz
