Idman.biz
Gürcüstanın paytaxtı Tbilisidə keçirilən Böyük Dəbilqə turnirində Azərbaycanın ağır çəkili cüdoçusu Camal Qamzatxanov uğurlu çıxışını davam etdirir.
İdman.Biz xəbər verir ki, +100 kq çəki dərəcəsində mübarizə aparan təmsilçimiz təsəlliverici görüşdə Polşa idmançısı Yakub Sordil ilə üz-üzə gəlib. Görüşü üstünlüklə başa vuran Qamzatxanov rəqibini ipponla məğlub edərək bürünc medal qarşılaşmasında iştirak etmək hüququ qazanıb.
İndi cüdoçumuzu fəxri kürsünün üçüncü pilləsi uğrunda həlledici sınaq gözləyir. O, turnirin son günündə Azərbaycan komandasına medal qazandırmaq üçün tatamiyə çıxacaq. Onun rəqibi Niderland idmançısı Yur Spaykers olacaq.
13:40
Gürcüstanın paytaxtı Tbilisidə keçirilən Böyük Dəbilqə turnirində Azərbaycanın ağır çəkili cüdoçusu Camal Qamzatxanov 1/4 final görüşünü keçirib.
İdman.Biz xəbər verir ki, +100 kq çəki dərəcəsində mübarizə aparan təmsilçimiz yarımfinala gedən yolda rusiyalı Artyom Zolotuxinlə qarşılaşıb. Gərgin keçən mübarizədə rəqibinə məğlub olan Qamzatxanov final şansını itirib.
Buna baxmayaraq, cüdoçumuz turnirdə mübarizəni dayandırmır. O, bürünc medal qazanmaq şansını qorumaq üçün təsəlliverici görüşə çıxacaq. Bu mərhələdə qalib gələcəyi təqdirdə, Camal üçüncü yer uğrunda həlledici qarşılaşmada iştirak etmək hüququ qazanacaq.
12:57
Gürcüstanın paytaxtı Tbilisidə keçirilən cüdo üzrə Böyük Dəbilqə turnirində Azərbaycanın ağır çəkili təmsilçiləri 1/8 final görüşlərini keçiriblər.
İdman.Biz xəbər verir ki, +100 kq çəki dərəcəsində mübarizə aparan Camal Qamzatxanov turnirə uğurlu start verib. O, ilk görüşündə Qazaxıstan idmançısı Yelaman Yerqaliyevlə qarşılaşıb. Gərgin keçən mübarizənin qızıl xal (Golden Score) bölümündə rəqibinə yuko fəndi ilə qalib gələn Qamzatxanov 1/4 finala vəsiqə qazanıb.
Eyni çəki dərəcəsində çıxış edən digər cüdoçumuz Kənan Nəsibov isə 1/8 finalda məğlubiyyətlə üzləşib. Almaniyalı Losseni Kone ilə qarşılaşan təmsilçimiz qızıl xal bölümündə rəqibinə uduzaraq yarışla erkən vidalaşmalı olub.
12:26
Gürcüstanın paytaxtı Tbilisidə keçirilən cüdo üzrə Böyük Dəbilqə turnirində Azərbaycanın ağır çəkili idmançılarının növbəti rəqibləri müəyyənləşib.
İdman.Biz xəbər verir ki, +100 kq çəki dərəcəsində mübarizə aparan hər iki cüdoçumuz 1/8 final mərhələsində ciddi rəqiblərlə qarşılaşacaqlar.
Kənan Nəsibov Almaniyadan olan Losseni Kone, Camal Qamzatxanov isə Qazaxıstan təmsilçisi Yelaman Yerqaliyevlə qarşılaşacaq.
Hər iki idmançımız bir nömrəli tatamidə mübarizə aparacaq. Kənan Nəsibovun görüşü proqram üzrə 21-ci, Camal Qamzatxanovun döyüşü isə 24-cü sırada yer alıb.
12:10
Gürcüstanın paytaxtı Tbilisidə keçirilən cüdo üzrə Böyük Dəbilqə turnirinin son günündə Azərbaycanın qadın idmançısı tatamiyə çıxıb.
İdman.Biz xəbər verir ki, +78 kq çəki dərəcəsində mübarizə aparan Madina Kaisinova yarışa 1/8 final mərhələsindən başlayıb. O, bu mərhələdə İtaliya təmsilçisi Erika Simonetti ilə qarşılaşıb.
Gərgin keçən görüşün əsas vaxtında qalib müəyyənləşmədiyi üçün qızıl xal (Golden Score) bölümünə ehtiyac duyulub. Bu hissədə rəqibinə məğlub olan Kaisinova turnirdə çıxışını başa vurub.
09:35
Gürcüstanın paytaxtı Tbilisidə keçirilən cüdo üzrə Böyük Dəbilqə turniri başa çatır. Yarışın son günündə Azərbaycan millisinin daha üç üzvü medallar uğrunda qüvvəsini sınayacaq.
İdman.Biz xəbər verir ki, bu gün həm kişilər, həm də qadınlar arasında ağır çəki dərəcələrində qaliblər müəyyənləşəcək. Kişilərin mübarizəsində +100 kq çəki dərəcəsində iki idmançımız 1/8 finaldan mərhələyə başlayacaq. Camal Qamzatxanov Saba Kardava (Gürcüstan) - Losseni Kone (Almaniya) cütünün qalibi ilə, Kənan Nəsibov isə Yelaman Yerqaliyev (Qazaxıstan) - Gela Zaalişvili (Gürcüstan) qarşılaşmasının qalibi ilə üz-üzə gələcək.
Qadınların yarışında isə +78 kq çəkidə çıxış edən Madina Kaisinova start götürəcək. O, 1/8 final mərhələsində İtaliya təmsilçisi Erika Simonetti ilə qarşılaşacaq.
