İdman.biz
Azərbaycan cüdoçularının bu il beynəlxalq arenada qazandığı medalların sayı bəlli olub.
İdman.biz xəbər verir ki, idmançılarımız 2024-cü ilin arxada qalan hissəsində böyüklər, gənclər, yeniyetmələr və veteranların yarışlarında 129 mükafat qazanıb.
Bunlardan 39-u qızıl, 30-u gümüş, 60-ı bürüncdür. Yığmamız bu göstəricidə dünyada 9-cu yerdə qərarlaşıb. Azərbaycan bu göstəricidə cüdonun yaradıcıları olan Yaponiyanı qabaqlayır. Asiyalılar 38 qızıl, 18 gümüş və 37 bürüncə sahib olub.
Təbii ki, çoxsaylı mükafatlar arasında Hidayət Heydərov (73 kq) və Zelim Kotsoyevin (100 kq) Abu-Dabidəki dünya çempionluqları xüsusi çəkiyə malikdir. Onların uğuru tarixi nəticə kimi yadda qalıb.
Bakıda keçirilən "Böyük Dəbilqə" turniri mükafat baxımından zəngin alınıb. Tatami sahib olan yığmamız evdə qızıl "het-trik"ə imza atıb. Hidayət Heydərov (73 kq), Zelim Tçkayev (81 kq) və Murad Fətiyev (90 kq) çempionluq yaşayıb.
Hidayət Heydərov (73 kq) və Elcan Hacıyevin (81 kq) fəxri kürsünün ən yüksək pilləsinə qalxdığı Avropa çempionatı da qeyd olunmalıdır. Yeri gəlmişkən, Elcan bu mövsüm artıq 5 dəfə fərqlənib. O, Paris və Tbilisidə "Böyük Dəbilqə" yarışlarının finala qədər irəliləyib, həmçinin Astanada keçirilən analoji turnirdə və Portuqaliyada keçirilən Qran-Pridə bürünc medal qazanıb.
Ümumi medal sıralamasına Fransa başçılıq edir: 112 qızıl, 96 gümüş və 165 bürünc. Gürcüstan (62-51-87) ikinci, Almaniya isə (61-51-82) üçüncüdür.
Zəki Feyzullayev
İdman.biz
