Idman.biz
"Boksçularımızın Avropa çempionatında əldə etdiyi nəticələrdən razı qaldıq".
Bu sözləri yeniyetmə boksçulardan ibarət Azərbaycan millisinin məşqçisi Teymur Məmmədov yığmanın Almaniyanın Keinbaum şəhərində keçirilən U-17 Avropa çempionatındakı çıxışını dəyərləndirərkən deyib.
O, yarışda qazanılan iki qızıl və iki gümüş medalı uğurlu nəticə hesab etdiyini bildirib.
"Ötən illə müqayisə etsək, bu dəfə nəticə çox gözəl oldu. Bizi tamamilə qane etdi. Medal qazanan idmançılarımızın hər biri potensiallı uşaqlardır. Onların gələcəklərini parlaq görürəm. Ümid edirəm ki, növbəti ildə də yaxşı çıxışlarla yadda qalacaqlar. Yer tuta bilməyən boksçularımız da pis döyüşmədilər. Bəzilərinin bəxti gətirmədi, ilk raunddan çox güclü idmançılarla qarşılaşdılar. Bəzilərində isə təcrübə çatmadı. Əsas odur ki, yarışı zədəsiz başa vurduq", - deyə o, AZƏRTAC-a açıqlamasında deyib.
T.Məmmədov Azərbaycanda yeniyetmələr arasında boksun inkişafını yüksək qiymətləndirib: "Hazırda yalnız müsbət fikirlər söyləmək olar. İnkişaf sürətlə gedir. Federasiya tərəfindən də gənc boksçuların hazırlığına xüsusi diqqət və dəstək göstərilir. Hər il istedadlı uşaqlar ortaya çıxır və komanda get-gedə güclənir. Bu, Azərbaycan boksunun gələcəyi üçün ümidvericidir".
Qeyd edək ki, millinin heyətində Gülər Hüseynova (48 kiloqram) və Qardaş Rəhimov (46 kiloqram) qızıl, Şahin Aslanov (60 kiloqram) və Şükar Əliyev (75 kiloqram) isə gümüş mükafata sahib çıxıb.
