Idman.biz
Dekabr ayında karyerasını bitirən amerikalı məğlubedilməz, beş çəki dərəcəsində dünya çempionu Terens Krouford (42-0, 31 nokaut) qərarının səbəbini izah edib.
İdman.Biz-in məlumatına görə, Krouford hesab edir ki, artıq onun boksda sübut edəcək heç nəyi qalmayıb.
"Mənim 38 yaşım var. 38 yaş boks üçün böyük yaşdır. Yeddi yaşımdan bəri boksla məşğulam. Sübut edəcək heç nəyim qalmayıb. Nail olacaq heç nəyim qalmayıb. Başqa nə edə bilərəm? Onsuz da haqqım olanı verməyəcəklər, ona görə də bunun heç bir əhəmiyyəti yoxdur" – "The Ring" qəzeti Krouforddan sitat gətirib.
Terens Kroufordun 38 yaşı var. Amerikalı peşəkar rinqdə 2008-ci ildə debüt edib. O, 2014-cü ildə yüngül çəkidə dünya çempionu (61,2 kq-a qədər), 2017-ci ildə birinci yarımorta çəkidə mütləq çempion (63,5 kq-a qədər), 2023-cü ildə yarımorta çəkidə mütləq çempion (66,7 kq-a qədər), 2024-cü ildə birinci orta çəkidə çempion (69,9 kq-a qədər), 2025-ci ildə ikinci orta çəkidə mütləq çempion (76,2 kq-a qədər) olub.
