Idman.biz
III MDB Oyunlarında karateçilərin çıxış etdiyi son yarış günü yığmamız üçün uğurlu alınıb.
İdman.biz xəbər verir ki, Şahin Atamovun rəhbərlik etdiyi komanda üç qızıl, iki gümüş və dörd bürünc medal qazanıb.
Qeyd edək ki, bu günə qədər III MDB Oyunlarında Azərbaycana ən çox qızıl medalı taekvondoçular qazandırıblar. Belə ki, taekvondoçular dörd qızıl medal əldə ediblər.
İndi isə diqqətlər karateçilərə yönəlib: görəsən, onlar bu nəticəni üstələyə biləcəklərmi?
İdman.biz bu sualla kişi karateçilərdən ibarət Azərbaycan yığmasının baş məşqçisi Şahin Atamova müraciət edib.
"Bəli, dünən idmançılarımız yaxşı çıxış etdilər, amma daha yaxşı nəticə də mümkündür. Düşünürəm ki, 60 kq çəki dərəcəsində çıxış edən Fərid Savadov finalda öz potensialını tam göstərə bilmədi və qızıl medalı əldən verdi. Amma bu, artıq dünəndə qaldı. Ümid edirəm ki, karateçilərimiz qızıl medal sayında rekord qıracaqlar. Bu gün üç qızıl medal qazanmağı planlaşdırırıq. Əminəm ki, karateçilər taekvondoçuların nəticəsini geridə qoyacaqlar", - deyə Şahin Atamov bildirib.
Vüqar Vüqarlı
