Idman.biz
"Tailanda gələndə hava şəraiti çox ağır gəldi, nəfəs almaqda çətinlik çəkirdim".
Bu sözləri hazırda Tailandda yaşayan Azərbaycan kikboksçusu Nihad Tağızadə AZƏRTAC-a müsahibəsində deyib.
Həmin müsahibəni təqdim edirik.
- Tailandda təlim prosesi necə keçir? Oradakı məşq sistemində nə kimi fərqliliklər var?
- Məşqlər gündə iki dəfə olmaqla, səhər və axşam keçirilir. Məşqlər ağır olur, amma artıq 12 ildir bu idman növü ilə məşğulam. Bədən artıq bu ritmə öyrəşib.
- Artıq üç aydır oradasınız. Bu müddətdə sizin üçün ən çətin olan nə olub? Döyüşlər, məşqlər, yoxsa adaptasiya?
- İlk gələndə hava şəraiti çox ağır gəldi, nəfəs almaqda çətinlik çəkirdim. Amma döyüş və məşq məsələsinə gəlsək, artıq bu idmanın içindəyik, hər çətinliyə hazırıq. Düşünürəm ki, hər nə qədər əziyyətli olsa da, Azərbaycan Bayrağını okeanın o tayında dalğalandırmaq və bu kimi hədəflər uğrunda çalışmaq bütün çətinlikləri unutdurur. Hazırda Tailandda öz hesabımıza məşq edirik. Maddi baxımdan hər hansı dəstəyimiz yoxdur. Bu da burada qalmaq və məşqləri davam etdirmək baxımından müəyyən çətinliklər yaradır.
- Üç döyüş keçirmisiniz və hər birində qələbə qazanmısınız. Özünüzdən belə nəticələr gözləyirdinizmi? Ümumiyyətlə, performansınızı necə qiymətləndirirsiniz?
- Bəli, artıq üç döyüş və üç qələbəm var. Onlardan ikisi nakautla nəticələnib. Bu qədər əziyyətdən sonra düşünürəm ki, qələbəyə layiqik. Qürbətdə olsaq da, sosial şəbəkələrdə insanların dəstəyi bizə əlavə motivasiya verir.
- Nakautla qazandığınız döyüşlərdə hansı taktikanız işə yaradı?
- Daha çox əllərdən istifadə edirdim. Amma qeyd etməliyəm ki, ayaq zərbələrim də kifayət qədər güclüdür.
- Tailandlı döyüşçülərlə mübarizə aparmaq necə təcrübə idi? Onların hansı xüsusiyyətləri sizi təəccübləndirdi?
- Tailandlı idmançılar uşaqlıqdan bu idmanın içindədirlər. Əlcək, avadanlıq onlar üçün oyuncağa çevrilib. İdman zallarında böyüyürlər. Döyüşdə çox soyuqqanlı və dözümlüdürlər. Nə qədər zərbə alsalar da, yerə yıxılsalar belə, dərhal qalxıb döyüşə davam edirlər. Bu xüsusiyyətləri məni təəccübləndirdi.
- Gələcək planlarınız nələrdir? Tailandda qalmağa davam edəcəksiniz, yoxsa Azərbaycana qayıdırsınız?
- Hələ ki Tailanddayam və qarşıda döyüşlər var. Həmişəki kimi döyüşlərə hazıram. Planım isə "ONE Championship" təşkilatında iştirak üçün lisenziya qazanmaqdır. O hədəfə doğru irəliləyirəm və inanıram ki, tezliklə həmin rinqdə də Azərbaycan bayrağını dalğalandıracağam.
- Azərbaycan və Tailanddakı döyüş idmanları sistemi arasında hansı əsas fərqləri görürsünüz?
- Əsas fərq ondan ibarətdir ki, Tailandda dözümlülük və güc üzərində daha çox çalışırlar. Bu da onları fiziki baxımdan daha dayanıqlı edir. Amma hesab edirəm ki, bizim idmançılar da heç bir baxımdan onlardan geri qalmır.
