"Sumqayıt"ın basketbol üzrə Azərbaycan çempionatında çıxış edən komandası mövsümün son oyunlarında uğurlu nəticələr əldə edir. Komandanın forvardı Rüstəm Əliyev bu yüksəlişin səbəblərini, müdafiə planında görülən işləri və mövsümün əsas hədəflərini dəyərləndirib.
İdman.Biz xəbər verir ki, basketbolçu klubun mətbuat xidmətinə müsahibəsində "Sumqayıt"ın ilk "4-lük"də yer almaq və yarımfinal mərhələsinə yüksəlmək istəyini də dilə gətirib.
Həmin müsahibəni təqdim edirik.
- Son iki turda qalib gəlirik. Yüksəlişin səbəbi nədir?
- Doğrusu, yalnız "Gəncə" üzərində qələbəni real qalibiyyət kimi qələmə verə bilərəm. "Ordu" ilə matçda rəqibin legionerləri meydana çıxmadı. Ona görə də bu qələbə ilə tam olaraq öyünmək olmur. Hər halda, meydanda başabaş mübarizə izləmədik. Amma "Gəncə"ni düzgün təhlil etmişdik, bu oyuna çox yaxşı hazırlaşmışdıq. Məncə, yüksəlişimizin səbəbi artıq bir yerdə çox vaxt keçirməyimizlə əlaqəlidir. Biz də artıq formalaşma mərhələsini uğurla adlamaqdayıq. Əslində, "Ordu" ilə matçı da kiçiltmək istəmirəm. Rəqibin hansı oyunçularla meydanda olmasına baxmayaraq, bir görüşə ciddi hazırlaşmışdıq. Fikrimcə, onlar legionerləri ilə oynasaydı da, qələbə qazana bilərdik.
- Bu mövsüm müdafiə planında oyunumuzda yüksəliş var. Bunu hansı planda inkişaf etdiririk?
- Bəli, bu mənada inkişaf göz qabağındadır. Məsələ ondadır ki, mövsümün əvvəlində yoldaşlıq oyunları keçirmədik, buna görə də səhvlərimizi görmədik. Səhvlərimiz liqa matçlarında üzə çıxdı, elə ən çox da problemlərimiz müdafiədə idi. Biz məhz bu səhvlərin üzərində işləyib inkişaf etdik.
- Komandanın yeganə çempionluq sevinci yaşayan oyunçusu sənsən. Klubumuzda hədəfin nədir?
- "Sumqayıt" komandası heç vaxt yuxarı pillələrdə olmayıb. Bu il məqsədimiz bu sindromu qırıb zirvəyə yüksəlməkdir. Mən "Sabah"da oynayarkən əvvəlcə komanda olaraq müntəzəm çempionatda minimum ilk "üçlük"də qərarlaşmaq istəmişik, pley-offa yüksələndə də finala vəsiqə qazanmaq arzusunda olmuşuq. "Sumqayıt"da da mövsümü ilk "4-lük"də bitirmək, yəni minimum yarımfinal seriyası oynamağı hədəfləyirik. Bu niyə də olmasın?!