Basketbol üzrə Avroliqanın iki oyunu Yaxın Şərqdəki hərbi əməliyyatlar səbəbindən təxirə salınıb

Basketbol üzrə Avroliqanın müntəzəm çempionatının iki oyunu Yaxın Şərqdə yaranmış gərgin vəziyyət səbəbindən təxirə salınıb.

"Report" xəbər verir ki, bu barədə turnirin mətbuat xidməti məlumat yayıb.

Bildirilib ki, İsrail təmsilçiləri "Makkabi" ilə "Hapoel" arasında keçirilməli görüş, həmçinin Serbiyanın "Partizan" klubu ilə BƏƏ-nin "Dubai" komandası arasındakı matç daha sonraya keçirilib. Hər iki qarşılaşma martın 5-nə planlaşdırılmışdı.

Xatırladaq ki, fevralın 28-də ABŞ və İsrail İran əleyhinə hərbi əməliyyata başlayıb. Zərbələr İranın ən böyük şəhərlərinə, o cümlədən Tehrana endirilib. Ağ ev hücumları Tehrandan qaynaqlandığı iddia olunan raket və nüvə təhdidləri ilə əsaslandırıb.

İranın İslam İnqilabı Keşikçiləri Korpusu isə cavab olaraq genişmiqyaslı əməliyyata başladığını bəyan edib və İsraildəki obyektlərə zərbələr endirildiyini açıqlayıb. Həmçinin Bəhreyn, İordaniya, Qətər, Küveyt, BƏƏ və Səudiyyə Ərəbistanında ABŞ-a məxsus hədəflərin də vurulduğu bildirilib.

Məlumata görə, İrana endirilən zərbələr nəticəsində ölkənin ali rəhbəri ayətullah Əli Xamenei və İslam Respublikasının rəhbərliyində təmsil olunan bir sıra digər əsas fiqurlar həlak olub.

Fevralın 28-dən etibarən regionun 10 ölkəsinin (İsrail, İran, İraq, Bəhreyn, Qətər, Küveyt, Oman, BƏƏ, Səudiyyə Ərəbistanı və Suriya) hava məkanı bağlanıb, sadalanan dövlətlərin doqquzuna və doqquzundan uçuşlar müvəqqəti dayandırılıb.