Sport24.az
"Qarşımıza mövsümü ilk "üçlük"də bitirməyi məqsəd qoymuşduq. Təəssüf ki, istəyimizə nail ola bilmədik". Bu sözləri Sport24.az-a açıqlamasında "Zaqatala"nın baş məşqçisi Rüstəm Məmmədov deyib.
Məmmədov başa çatan mövsümü də şərh edib: "Bu il bizim üçün heç də istədiyimiz kimi keçmədi. Bir çox problemlər yaşadıq. Əksər futbolçular düşərgəni tərk etdiyindən ehtiyat oyunçular skamyamız kasad oldu. Məhdud büdcəylə malik arzuladığımız transferləri həyata keçirə bilmədik. Etdiyimiz transferlər isə gedənlərin yerini layiqincə doldura bilmədi. Həmçinin cəzalı, zədəlilərimiz də çox oldu. Çempionatın ikinci yarısını 13 futbolçu ilə keçirdik. Digərləri isə aşağı yaş qruplarından dəvət etdiyim yeniyetmələr idi ki, heç bir təcrübələri yox idi. Bütün bu dediklərimi və qeyd etmədiyim başqa çatışmazlıqları nəzərə alsaq, mövsümü 6-cı pillədə başa vurmağımızı qənaətbəxş hesab edirəm".
Bölgə təmsilçisinin baş məşqçisi yeni mövsüm üçün planları barədə də danışıb: "Hələlik istirahətdəyik. Amma qarşıdakı günlərdə rəhbərliklə görüşümüz olacaq. Böyük ehtimalla yeni "futbol ili"ndə çempionluğa, ən pis halda isə ilk "üçlüy"ə düşmək uğrunda mübarizə aparacağıq".
ABDULLA İSMAYILOĞLU
