Yuri Vernidub "Qəbələ" - "Neftçi" oyunundan sonra fikirlərini bölüşüb və Ukrayna mətbuatının reaksiyasına cavab verib

Misli Premyer Liqasının 24-cü turunda "Neftçi" səfərdə "Qəbələ"ni 3:1 hesabı ilə məğlub edib. Sport24.az xəbər verir ki, "Neftçi"nin baş məşqçisi Yuri Vernidub oyundan sonra keçirilən mətbuat konfransında oyun haqda fikirlərini bölüşüb:

"Azarkeşlərimizə təşəkkür etmək istəyirəm. Maraqlı oyun alındı. "Qəbələ" uduzmağına baxmayaraq onların oyunu mənim xoşuma gəlir. Hakimliklə bağlı onu deyə bilərəm ki, bu cür davam edərsə hər şey yaxşı olacaq. Qəbələdə çox gözəl futbol mərkəzi var. Stadion superdir. Məşq üçün də çox gözəl meydançaları var".

Avrokuboklara vəsiqə uğrunda mübarizə mövzusuna da toxunan mütəxəssis bunları qeyd edib: " Avrokuboklara getməməyimiz faciə olmaz, sadəcə xoşagəlməz hadisə olar. Bir neçə namizəd var. Əlimizdən gələni edəcəyik. Hələ 10 tur qalıb. Uğur bizim əl, ayaq və bədənimizdən asılıdır."

Ötən turda keçirilən "Turan Tovuz"la matçdan sonra rəqibin baş məşqçisi Kurban Berdıyevlə görüşməsindən sonra Ukrayna mətbuatında xoş qarşılanmamasından da söz açan Vernidub məsələyə belə yanaşıb: "Yazılanlar mənə maraqlı deyil. Bilmirəm, Berdıyevin neçə pasportu var. Bildiyim qədərilə o, türkməndir. Şəkillərdə nə qoyduğunu da bilmirdim. Qısası, müharibənin ilk günündə necə idimsə, indi də eləyəm. Kimlər ki, bu barədə yazırlar, desinlər görək dörd il ərzində nə ediblər? Mənim 60 yaşım var, nə qədər istəsələr provokasiyaya cəlb etsinlər. Mən futboldayam və işimə davam edirəm."