Sport24.az
Ötən mövsümü "Kəpəz"də keçirən Vurğun Hüseynovun karyerasını davam etdirib-etdirməyəcəyi hələ dəqiqləşməyib. Təcrübəli müdafiəçi Sport24.az-a müsahibəsində həm bu mövzuya toxunub, həm də bizi maraqlandıran başqa suallara cavab verib.
- "Kəpəz"də hazırda vəziyyət necədi?
- Hələlik durğunluqdu, gözləyirik.
- Gələcək karyeran haqqında nə düşünürsən?
- Səmimi deyim ki, ötən mövsümün əvvəlində karyeramı bitirmək istəyirdim. Sadəcə, təcrübəli oyunçu kimi komandada olmağım məsləhət oldu və karyeramı davam etdirdim. Təcrübəli futbolçu kimi yenə xidmətimdə maraqlı olsalar bir mövsüm də futbol oynaya bilərəm.
- "Kəpəz"də suallara nə vaxt aydınlıq gələcək?
- Bu bizdən asılı məsələ deyil. Məncə, büdcə təsdiqlənməli və sponsorlarla danışıqlar müsbət həll olummalıdı. Ondan sonra bütün qaranlıq məqamlara aydınlıq gələcək.
- "Kəpəz" sənin xidmətində maraqlı olmasa nə edəcən?
- Aşağı yaş qruplarının birində məşqçi kimi çalışa bilərəm.
- Əksər təcrübəli futbolçularımız karyeralarının sonunda I Liqaya üz tutur. Sən də bu addımı ata bilərsən?
- İndidən nəsə deməyimiz düz çıxmaz. Futbolda hər şey ola bilər. Amma başlıca məqsədim uşaq futbolunda məşqçiliyə başlamaqdı.
- Yığmanın son 2 yoxlama matçı barədə fikirlərini bilmək maraqlı olardı...
- Albaniyanın gücü və heyəti hamıya məlumdu. Onlarla ilk hissədə zəif oynadıq, amma fasilədən sonra komanda özünə gəlsə də, məğlubiyyətdən qaça bilmədik. Qazaxlarla ilə matçda isə 2 top geridə olsaq da, xarakter göstərib geridönüş edərək meydandan qələbəylə ayrıldıq. İki oyunu nəzərə alsaq, futbolçularımız ümumi götürəndə pis çıxış etmədilər.
- Qarşıdakı seçmə mərhələdə nəyə ümid edə bilərik?
- Konkret nəsə demək olmaz. Ən azı ötən tsikllə müqayisədə qrupda daha üst pillədə qərarlaşmaq mümkündü.
- Yığmamıza portuqaliyalı Fernandu Santuş baş məşqçi təyin olundu. Buna münasibətin?
- Kimin millidə baş məşqçi olmasından asılı olmayaraq arzum odur ki, ölkənin əsas komandasını irəli aparsın.
ABDULLA İSMAYILOĞLU
