Sport24.az
"Qazaxıstanla matçda bir daha şahid olduq ki, potensiallı yığmamız var və bu milli ilə qarşıya qoyulan məqsədə çatmaq mümkündür". Bu sözləri Sport24.az açıqlamasında Məşqçilər Komitəsinin sədri Vaqif Sadıqov deyib.
Milli komandanın baş məşqçi postuna Fernandu Santuşun təyin olunmasına münasibət bildirən təcrübəli mütəxəssis ölkənin əsas komandasının son yoldaşlıq matçını da şərh edib: "Qazaxıstanla matçda Arif Əsədovun tapşırıqlarını meydanda həyata keçirən komanda gördük. Əsədov qarşılaşmadan öncə dominant futbol oynamağa çalışacaqlarını və rəqibə təzyiq göstərib, sürətli futbol nümayiş etdirəcəklərini demişdi. Bunlar ondan irəli gəlir ki, bu gün komandanın daxilində futbolçu-məşqçi münasibəti çox yüksək səviyyədədir. Ümumiyyətlə, düşərgədə sağlam abu-hava olanda uğura imza atmaq mümkündür. 0:2 hesabı ilə geridə olan yığmamızın geridönüşünü ancaq alqışlamaq lazımdı".
Qeyd edək ki, İcraiyyə komitəsinin qərarı ilə bu gün portuqaliyalı Fernandu Santuş millinin yeni baş məşqçisi təyin olunub.
