Idman.biz
"Sabah" komandasının 48 yaşlı baş məşqçisi Valdas Dambrauskas futbol dünyasında təkcə məşqçilik fəaliyyəti ilə deyil, həm də qeyri-adi həyat hekayəsi ilə tanınır.
İdman.Biz xəbər verir ki, o, viktorinalara xüsusi marağı ilə seçilir.
Məlumata görə, viktorinaya hazırlıq dövründə bir aya 19 kitab oxuyub. Daha diqqətçəkən məqam isə 2002-ci ildə, 25 yaşında olarkən Litvada "Kim milyonçu olmaq istəyir?" verilişinin yerli versiyasında iştirakı olub.
Həmin viktorina "Šeši nuliai – milijonas" adlanır. Dambrauskas oyunda 4 min Litva liti (təxminən 2230 AZN) qazanıb. O, ən çox gündəlik qəzetin hansı ölkədə çap olunduğu (doğru cavab: Yaponiya) sualına cavab verə bilməyərək oyunu dayandırıb.
Qazandığı pul Dambrauskasın həyatında dönüş nöqtəsinə çevrilib. 25 yaşlı Dambrauskas qazandığı pulla həyat yoldaşı ilə birlikdə İngiltərəyə yollanıb və "London Metropolitan" Universitetinə qəbul olunub. O, "İdman elmi və məşqçilik" ixtisası üzrə ali təhsil alıb, eyni zamanda İngiltərədə bir sıra gənclər akademiyalarında təcrübə keçib. Siyahıya "Fulhem", "Mançester Yunayted" və "Brentford" kimi klublar daxildir.
2007-ci ildə Valdas Dambrauskas İngiltərə futbolunun doqquzuncu səviyyəsində çıxış edən "Kingsbury London Tigers" klubunda menecer kimi çalışmağa başlayıb. Daha sonra Litvanın U-17 (2009–2010) və U-19 (2011–2012) milli komandalarında, ölkəsinin "Ekranas" (2011–2014) və "Jalgiris" (2015–2017) klublarında, Latviyanın "Riqa" (2017–2020) və Xorvatiyanın "Qoritsa" (2020–2021) komandalarında fəaliyyət göstərib. Sonradan bu yol onu "Sabah"a qədər gətirib çıxarıb.
Dambrauskas müsahibələrinin birində daim yüksək hədəflər altında işləməyə öyrəşdiyini bildirib:
"Komandalarımı adətən birinci yerdə və ya ona yaxın mövqedə görməyə öyrəşmişəm. Bundan başqa hər hansı hədəf mənim üçün qəbuledilməzdir. Böyük təzyiq altında yüksək hədəflər uğrunda mübarizə aparmaq mənim üçün bir imtiyazdır. Ən pisi heç nə uğrunda oynamaq, turnir cədvəlinin ortasında qalmaqdır. Sosial şəbəkələrlə maraqlanmıram. İşin yeganə ölçüsü nəticələrdir. Azarkeşlərin tənqidi isə məni daha çox işləməyə vadar edir ki, sonda onlar klubları və onun nailiyyətləri ilə fəxr etsinlər".
Beləliklə, viktorina səhnəsindən böyük futbola qədər uzanan bu yol Valdas Dambrauskası müasir futbolda fərqli və maraqlı fiqura çevirib. "Sabah" isə ondan həm nəticə, həm də iddialı oyun gözlənilir və o nəticə dünənki oyunda özünü göstərib.
