Idman.biz
Türkiyə milli komandası DÇ-2026-nın Avropa zonası E qrupunda İspaniya ilə səfər oyununda 2:2 hesablı heç-heçə edərək qrupu ikinci pillədə başa vurdub və pley-off mərhələsinə yüksəlib.
İdman.Biz xəbər verir ki, Türkiyə millisi pley-offa vəsiqəni qrupun 5-ci turunda Bolqarıstan üzərində 2:0 hesablı qələbə ilə təmin etmişdi. Dünən keçirilən oyunlardan sonra pley-off mərhələsində yer alacaq bütün komandalar məlum olub.
Pley-off necə keçiriləcək?
2026 Dünya çempionatı pley-offunda seçmə mərhələdən 12, Millətlər Liqasından isə 4 komanda iştirak edəcək. Ümumilikdə 16 komanda 4 səbətə ayrılacaq. 1-ci səbət 4-cü səbətlə, 2-ci səbət isə 3-cü səbətlə qarşılaşacaq.
Oyunların tarixləri
Yarımfinal 26 mart 2026-cı il tarixində keçiriləcək. Final isə 31 mart 2026-cı il tarixinə təyin olunub.
Matçlar tək oyun üzərindən keçiriləcək. Finalı qazanan komanda dünya çempionatına vəsiqə əldə edəcək. 1-ci və 2-ci səbətdəki komandalar yarımfinal oyunlarını evdə keçirəcək, finalın meydan sahibi püşkatmadan sonra müəyyənləşəcək.
Türkiyənin mümkün rəqibləri
Türkiyə 1-ci səbətdə yer alacaq və 4-cü səbətin komandalarından biri ilə qarşılaşacaq.
1-ci səbət: Türkiyə, İtaliya, Ukrayna, Danimarka
2-ci səbət: Uels, Polşa, Çex, Slovakiya
3-cü səbət: Albaniya, İrlandiya, Kosovo, Bosniya və Herseqovina
4-cü səbət: Rumıniya, İsveç, Şimali İrlandiya, Şimali Makedoniya
Pley-off püşkü 20 noyabr tarixində İsveçrənin Sürix şəhərində keçiriləcək.
