Tovuzsayağı avtoqol

CEYHUN ƏLİYEV


Ötən axşam gözlənilməz xəbərlə tamamlandı. "Turan Tovuz" rəhbərliyi baş məşqçi Ayxan Abbasovla yolları ayırdı. Bu, "aydın səmada şimşək effekti" yaratdı. Doğrudu, mövsümün gedişatında istedadlı mütəxəssisi istefaya səsləyənlər olurdu. Ancaq ən mürəkkəb vəziyyətdə də klub rəhbərliyi, xüsusilə Ehtiram Quliyev 43 yaşlı çalışdırıcıya dayaq oldu.


Mövsümün son turunda da komanda özünəməxsus tərzdə qələbə qazandı ki, bu da növbəti mövsümə nikbin əhval-ruhiyyədə hazırlaşmağa əsas verdi. Ancaq qarşıya qoyulan məqsədə çatan klubun rəhbəri bu dəfə yumşaq desək, cığallıq etdi. Klubda işlədiyi gündən baş məşqçiyə güvəndiyini bildirən Quliyev hansısa qeyri-müəyyən səbəbdən qeyri-peşəkar addım atdı.


Qarşısına avrozonaya düşmək vəzifəsi qoyulmayan məşqçiyə qapını göstərmək hara, daha əvvəllər səsləndirilən gəlişigözəl sözlər hara!? Pafos idi, Ehtiram bəy?! Qısa zamanda qazandığınız imicə çox ciddi zərbə vurdunuz. Yəqin ki, bunu ətrafınızdakıların deməyə cürəti çatmayacaq, amma bilin ki, bundan sonra verəcəyiniz hər açıqlamaya ən azı ürəklərdə belə bir sual yaranacaq: "Ayxana dair dediyiniz söz kimi?".


"Qarşılıqlı razılıq əsasında" deməklə siz maddi razılığı nəzərdə tuta bilərsiniz. Ancaq məsələnin mənəvi tərəfi var. Komanda 53 (!) qolla məhsuldarlıqda ancaq "Qarabağ"dan geri qalıb. Hədəf avrozona deyildi, amma komanda az qala sonadək 4-cü yer uğrunda mübarizədən qopmadı. Və elə Ehtiram Quliyev özü dediyi kimi növbəti mövsüm üçün hədəf Konfrans Liqası idi ki, Ayxan Abbasov bunu "Zirə"ylə də bacarıb, "Sumqayıt"la da. Yəni, avrokuboka çıxmağın yolunu bilir. Əminəm ki, məşqçi karyerasında hələ dəfələrlə avrokubok həyəcanı yaşayacaq Abbasov.


Düzdü, "heç vaxt "heç vaxt" demə" deyimi də var. Bəlkə də yaxın günlərdə Tovuz klubunun düşərgəsindən elə bir açıqlama gələcək ki, Quliyevi haqlı hesab edə biləcəyik. Ancaq şəxsən mən buna inanmıram. Kamal Bayramovun məlum açıqlaması? Buna görə məşqçi işdən azad edilmir! Daha bir variant budu ki, Quliyevə tapşırılıb ki, baş məşqçiylə yolları ayır. Ancaq belə bir hal yaşanıbsa da, klub rəhbəri bunu heç vaxt etiraf etməyəcək. Bütün hallarda, qərar verilib. Aydın məsələdir ki, "Turan" uduzdu. Təki məğlubiyyət uzunmüddətli olmasın...