"Turnirə yaxşı hazırlaşmışdıq. Məqsədimiz turnirin qalibi olmaq idi. Amma Qazaxıtanla oyunda penaltilər seriyasında uğursuz olmaqla istədiyimizə nail ola bilmədik". Bu sözləri Sport24.az-a açıqlamasında minifutbol yığmasının üzvü Təmkin Xəlilzadə deyib.
Sarayevoya yollanan komandanın heyətində yer alan təcrübəli futbolçu turnirlə bağlı təəssüratlarını bölüşüb: "Qrup mərhələsində rəqiblərimizi sıradan çıxarmaqla maksimum nəticə qazandıq. 1/8 final mərhələsində Bolqarıstan hər nə qədər bizə başağrı olsa da, onları da məğlub edə bildik. ¼-də isə bizi daha güclü və ehtiyatlı oyunu ilə seçilən Qazaxıstan gözləyirdi. Onlarla da oyuna pis başlamadıq. İlk dəqiqələrdən meydanda diqtə edən tərəf biz olsaq da, rəqib müdafiədə səhvə yol vermədi. Final fitinə kimi onlar arxa xətdə bizə boşluq vermədi. Çox çalışsaq da,lazım olan qolu vura bilmədik. Sonda penaltilər seriyası oldu. "Lotoreya"da isə kimin uğur qazanacağı əvvəlcədən bəlli olmur. Təəssüflər olsun ki, qazaxlar penalti zərbələrini daha dəqiq yerinə yetiməklə bizi turnirdən kənarlaşdırdılar".
Təmkin Xəlilzadə böyük futbola qayıdacağına da ümidlidi: "Futbol oynamaq üçün eşqim və gücüm hələ var. Böyük futboldan uzaq düşsəm də, bu o demək deyil ki, karyeramı başa çatdırmışam. Böyük futbola qayıdacağım istisna olunmur. İnanıram ki, yeni mövsümdən etibarən mən də yaşıl meydanlarda olacam".
ABDULLA İSMAYILOĞLU