Idman.biz
Türkiyənin "Fənərbağça" klubunun hücumameyilli yarımmüdafiəçisi Anderson Taliska mövsümdəki parlaq çıxışı ilə yeni müqaviləyə yaxınlaşıb. Komandanın "Alanyaspor"u məğlub etdiyi oyunda iki qol vuran braziliyalı futbolçu komandanın əsas yükünü çiyinlərinə götürən adlardan biri olub.
İdman.Biz "Sabah" nəşrinə istinadla xəbər verir ki, klub rəhbərliyi mövsümün sonunda başa çatacaq müqaviləni uzatmaq qərarına gəlib.
Razılaşmaya əsasən, Taliska "Fənərbağça" ilə iki illik yeni müqavilə imzalayacaq və futbolçunun illik qazancı 5 milyon avro (təxminən 9,9 milyon AZN) təşkil edəcək. Beləliklə, ümumi məvacib 10 milyon avro (təxminən 19,8 milyon AZN) olacaq.
Bildirilib ki, ötən mövsümün qış fasiləsində İstanbul klubuna 1,5 illik müqavilə ilə qoşulan Taliska¬nın hazırkı sözləşməsi 2026-cı ilin iyununda başa çatırdı. Son dövrlərdə qolları və assistləri ilə komandanı daşıyan futbolçunun qalması məsələsi əsas müzakirə mövzusu idi.
Baş məşqçi Tedesko "Alanya" oyunu sonrası mövqeyini açıq ifadə edib:
"Bu mövzuda mənim üçün hər şey aydındır, o qalmalıdır. 10 nömrə mövqeyində həm uzunboylu, həm də sol ayaqlı belə oyunçu tapmaq çətindir. 9 nömrədə oynadanda da arxaya qaçışları çox yaxşı edir".
Məlumatlara görə, klubla futbolçu arasındakı danışıqlar müsbət yekunlaşıb. Braziliyadan aldığı təklifləri rədd edən Taliska "Fənərbağça"da qalmaq istədiyini bildirib və əvvəlki 7,5 milyon avroluq (15 milyon AZN) maaşında endirimə razılaşıb.
Cari mövsümdə 17 qol və üç assistlə yadda qalan braziliyalı futbolçu məhsuldarlıq siyahısında ikinci pillədə qərarlaşıb. O, daha dörd qol vuracağı təqdirdə "Beşiktaş"da keçirdiyi ən məhsuldar mövsümdəki 20 qolluq göstəricisini də geridə qoyacaq.
