Taleh Nəsirov: "Çempionluğun bu məsələyə böyük təsiri olacaq"

Azərbaycan Minifutbol Federasiyasının vitse-prezidenti Taleh Nəsibov millinin açıq məşqində jurnalistlərin suallarını cavablandırıb. Sport24.az xəbər verir ki, qurum rəsmisi yığmanın Avropa çempionatında hədəfini açıqlayıb, gələcək planlardan danışıb.

- Avropa çempionatına hazırlığı necə dəyərləndirirsiz?

- Millimiz Monteneqroda yaxşı təlim-məşq toplanışı keçdi və mini turnirdə iştirak edərək qalibi oldu. İstəyirik ki, 2022-ci ildə qazandığımız titulu qoruyaq. Bu çətin olacaq, amma əlimizdən gələni edəcəyik. Milli komandanı hər şeylə təmin etmişik. Sarayevoda keçiriləcək Avropa çempionatına lider kimi yollanırıq. Digər komandalar Azərbaycana başqa gözlə baxırlar. Bizi daha yaxşı analiz ediblər. Bütün futbolçular AML-da çıxış ediblər. Liqanın oyunları da yutub kanalımızda canlı yayımlanıb. Bu o deməkdir ki, digər iştirakçıların bizi yaxşı analiz etməyə fürsətləri var. Belçika, Fransa və İtaliya ilə eyni qrupdayıq. Ümid edirik ki, qrupda birinci olacağıq və kubokla qayıdacağıq.

- Millinin təlim-məşq bazasının və stadionunun tikilməsi nə vaxta nəzərdə tutulub?

- Bunun hamısı vəsait tələb edir. Plan var, layihə üzərində işlənilir. Yaxın günlərdə bu barədə məlumat veriləcək.

- Avropa çempionu olsaz, bu iş sürətlənə bilər?

- Çempionluğun bu məsələyə böyük təsiri olacaq.

- Qarşıdakı qitə çempionatında gümüş və ya bürünc medal qazansaz, bu uğur sayılacaq, yoxsa?

- Hər bir idmançı beynəlxalq yarışa yollanarkən qızıl medalı fikirləşməlidir. Elə idman növü var ki, orda hər 3 yer uğurdur. Düşüncəm odur ki, çempionluq böyük uğurdur. Digər yerlər isə ürəkaçan deyil. Biz daha yaxşısına layiqik. Bütün oyunçular məsuliyyəti dərk edir və yalnız 1-ci yer barədə fikirləşirlər. Ümid edirəm ki, bunu bacaracağıq.

- Regionlarda minifutbolun inkişafı üçün hansı işlər görməyi düşünürsüz?

- Federasiya prezidenti Orxan Məmmədovun də vurğuladığı kimi, regionlarda klubların artmasının üzərində çalışırıq. Müxtəlif yaş qrupları üzrə komandaları formalaşdırmaq istəyirik. Gələn ildən U-23 dünya və Avropa çempionatı keçiriləcək. Biz də ora komanda hazırlamağa start verəcəyik.